今年再度封視帝后的郭晉安及佘詩曼，對比首次得獎與當下的心態，無疑是有所轉變，他倆認為今次得獎意義重大。佘詩曼在事業上進入蜜月期，可惜單身的她卻未遇到對象分享甜美成果，她慨嘆搵完美的伴侶並非易事，笑言搵錢易過搵真愛！而家庭美滿的安仔則決心以事業回報家人支持，誓要寫下第四次視帝創舉。成功「回春」的他笑言要重返「偶像派」，將林峯的粉絲擸到手！

強勢回歸無綫的阿佘事業得意，但愛情路上仍苦等如意郎君。

等足九年，安仔終覓得《忠奸人》內的「高哲行」一角搣甩傻仔形象。

雄心壯志的安仔希望再下一城「四奪視帝」，開創電視界先河。

應屆視帝后安仔與阿佘皆認為得獎意義重大。

甜姐兒阿佘開到聲話拍拖只憑感覺唔講錢，有心人收到未啫？

在《使》劇中，阿佘於醫院哭悼亡母一幕令觀眾看得心碎。

阿佘呢啲咪超視后級演技囉！

安仔感激愛妻區倩怡及一對子女默默支持其演藝之路。

在《阿旺新傳》扮傻的安仔，往後幾年被定型。

佘詩曼

年屆五十歲的郭晉安（安仔）愈演愈青春，他笑言要重返「偶像派」強搶林峯粉絲：「有仔女令我更有童真，依家有咗（攞獎）實力，就走番偶像派，我趁林峯唔喺度，擸埋佢啲粉絲！」子女令安仔「重生」，他對生B卻選擇隨緣：「睇緣分！我同太太冇諗再生或唔生，依家湊兩個容易集中精神，將會為佢哋重新裝修屋企半年。（再生B？）咁就要靠哥哥（郭令山）照顧佢喇！」

愛妻心切

結婚生仔後他對「身教」有深切體會，決意執正自己成為子女榜樣。提起愛妻區倩怡一直默默支持，一臉冧爆的他再次感激愛妻的包容及體貼：「演員靠情緒搵飯食，一失控就會任性。見到太太唔出聲咁受晒（氣），我都難過自己唔成熟！佢之前同仔女拍咗條驚喜短片畀我，話我知屋企由佢睇住同叫我安心工作，我感動到即刻打電話畀佢！（心情好冧？）冧到講唔到嘢！」

時間競賽

成功追平好友羅嘉良與黎耀祥的「三屆視帝」紀錄，問到是否有意再創先河，成為史上首位「四屆視帝」？經過多年沉澱的他直認往後將與時間角力，鬥快完成破格目標：「我有心攞，但要同時間鬥快，因為我已經唔想再等多十年！我會加倍努力同抓緊機會！」他在頒獎禮上眼濕濕感謝子女，並指成家立室後拋開自大及驕傲。曾經年少輕狂的他個性剛烈，曾誤將自大當作自信，不惜「起晒弶」與劇集導演「駁火」：「以前成敗得失都自己孭，產生嘅壓力就造成盲點。我試過同導演吵大鑊，企硬唔合作，仲大言不慚咁話『我係要咁演，得唔得都由我負責』！我起晒棱角，結果令到為件事好嘅人都受傷害。」

再見傻仔

安仔今年憑「奸到心寒」的跛腳律師「高哲行」成功稱帝，榮升無綫「三屆視帝」。安仔笑言2003及2005年以「丁常旺」一角兩奪視帝後「傻足十年」，今次得獎搣甩傻仔形象，為事業打下最有力強心針：「攞到獎令我感覺跳過咗難關，已經再冇被定型嘅感覺，之後我會好有信心去試其他嘢！」

雖然事業進入蜜月期，但「最佳女主角」佘詩曼身邊卻欠缺男主角。重返娘家的她事業再創高峰，不擔心強勢令異性卻步的她，坦言擇偶條件並不苛刻，只要找到一個值得去愛的人已滿足，憑感覺做事的她慨嘆緣分未到，笑言搵錢比真愛容易得多！

感情零分

有了8年前的經驗，阿佘今次攞獎未如上次般激動，惟宣布時難免緊張，問到揀戲會否更有要求？她說：「希望可以揀到部劇可以承接住《使徒行者》，令大家有新鮮感。」再度封后對她可算是享受甜美成果，談到會否嫁人？她坦言感情「零蛋」：「對普通人嚟講，完美人生係事業美滿，又有埋另一半就得，但呢樣嘢係咪可以強求？其實好多嘢都身不由己，呢刻可以話係事業高峰期，點會冇嘢做！忙到咁邊有時間去發展感情，起碼要過一排先得，但到時呢個人又未必出現，所以要搵完美另一半唔容易。」

勇敢去愛

地位再度「升呢」的阿佘不諱言有異性因而卻步，但她認為愛情中包含勇敢：「有呢樣嘢先係我值得去愛嘅人，我對另一半冇非凡要求，可以溝通到就得！（有人等緊你？）傾得埋男性朋友有喺度，發展到就未有，我一向憑感覺，如果向錢看一早嫁咗，對方有錢，但未去到值得我嫁嘅地步，我知想搵自己鍾意嘅好難，錢我不缺，只係等緊個我真心去愛嘅人，但好難搵，搵錢易過搵愛啦！」

談到近期威水史，阿佘笑不攏嘴地指頒獎禮過後，驚喜一浪接一浪：「平時一返屋企就會入房落妝，所以10個圈外好姊妹就匿埋喺房度，點知我因為着咗成日高踭鞋好痛，返到去隻腳抽筋抽咗5分鐘，又喺廳搞一大輪先返房，佢哋等咗好耐，我一入房真係畀佢哋嚇親，好驚嚇！之後就成班人食媽咪煮嘅大餐。」

后繼無人

阿佘憑《使》劇中「釘姐」一角深受劇迷支持，其「超視后級」演技令角色恍如度身訂造，在各大頒獎禮上拎獎拎到手軟！出走無綫兩年後強勢回歸的她未敢怠慢，在《使》劇中一鳴驚人，先後在新加坡及馬來西亞封后，日前更一口氣連奪「2014年度中國內地最受歡迎TVB劇女藝人」、《萬千星輝頒獎典禮2014》「最佳女主角」及「最受歡迎電視女角色」成為5料視后，創下電視史紀錄，風頭一時無兩！