2003年出道的鄭融（Stephanie），經歷事業的高低起跌，到今天人成熟了之餘心態亦轉變了，甚至不介意將圈外男友掛在嘴邊。對於工作，Stephanie依然有火，滿腹大計的她更希望新作品能以自己率性的一面呈現給樂迷。

入行十一年的Stephanie，經歷事業的高低起跌，但心中仍然有火。

Stephanie不介意向男友憑歌寄意，更表示歌曲靈感來自朋友的婚禮。

鄭融

Stephanie定下一連串的工作大計，明年更會出新碟。

Stephanie（右）去年底舉行了兩場演唱會，更請來楊千嬅任神秘嘉賓。

Stephanie（左）與薛凱琪十分友好，開騷時更獲對方撐場。

Stephanie講起跑步即十分雀躍，表情多多。

為紀錄出道十年，鄭融去年底舉行了兩場演唱會，叫好叫座。今年踏入第十一年，Stephanie早已定下一連串的工作大計：「明年會出新碟，今年有三首新歌派台，今次打算每首歌都要派台直到出碟。」她自言此舉是一個全新的做法：「係一個幾得意嘅做法，因為每首歌都有唔同訊息想帶出，加上平日身邊發生咩事我都有記錄低，有好多Idea喺腦入面。」

玩味快歌宣揚Relax......

Stephanie坦言入行至今令人津津樂道的作品如《非凡人生》等，都完全交由填詞人去發揮，她說：「今次嘅歌每首都有嘢想講，好多畫面想交代，好似新歌叫《哎呀》，係充滿玩味而且好輕快嘅歌，歌詞特點係白話好多，主要想叫大家輕鬆，唔好淨係諗住返工返學，唔記得咗點樣去Relax，所以首歌用意都係宣揚叫大家放鬆、開心同玩多啲。」

心態輕鬆的Stephanie，甚至不介意向男友憑歌寄意，她說：「仲有另一首係我今年好鍾意、好浪漫嘅慢歌，我自己一路冇唱過咁Sweet嘅慢歌，但依家我覺得甜蜜嘅感覺多咗，所以先可以唱到呢個甜蜜嘅感覺。」

情歌靈感來自婚禮......

提到男友即時笑得甜絲絲的Stephanie表示，歌曲靈感來自朋友的婚禮：「近來出席咗好多朋友婚禮，我以前好怕見到人哋結婚，好似好大責任同好大壓力咁，但慢慢開始去多咗朋友嘅婚禮，對結婚、婚禮嘅感覺唔同咗，識得替人哋開心。」

除了看待婚姻的角度轉變了之外，對於情侶間相處亦有更深理解：「兩個人相處要學識生活上點去遷就同包容對方，互相都要畀心機去付出、去愛對方。」言下之意是否已視對方為結婚對象？Stephanie說：「依家感情好穩定好開心，但暫時未有呢個計劃，亦未係時候，我哋現階段對工作都仲好有衝勁，大家都好明白。」

隨心而為想做就做......

回顧入行十一年，Stephanie直言心態亦較以前有大轉變，她說：「以前入行初期好唔識平衡，加上我有時性格好緊張，搞到精神好差，後來識得方法去平衡自己工作同壓力。」她續說：「入咗行咁耐，好多嘢好似可以放開咗好多，而且本身性格都係比較隨心，好多時諗到就做，例如平時着件咩衫化個咩妝，唔需要刻意諗過度過，好隨意就去做，所以嚟緊新MV造型都會係好搞笑，只要我覺得開心好玩就去做，純粹For Fun。」

後記：跑出香港

訪問當日，Stephanie狀態一般，細問之下才知她帶病上陣，但訪問時當談起跑步，她像充電般火速回復精神：「我覺得跑步令我精神放鬆，之前先去完美國跑馬拉松，跑步可以跑到出香港，我覺得好正。」愈講愈精神，像忘卻了自己有病在身。