「釘姐」佘詩曼出走無綫兩年後強勢回歸,頭炮孭飛劇氣勢逼人,已率先連掃星馬兩地視后獎,明日舉行的無綫頒獎禮,於投票走勢榜位列No.1的她,再度大熱封后的成數甚高,有望連過三關成為大滿貫視后。不過阿佘帶點保留,認為意料之中亦會有喜出望外一刻,直言心情緊張,幸好工作繁忙才讓她分散注意力。而走勢榜五強中,王菀之竟進佔第四,叫人意外!

佘詩曼

徐子珊打定輸數照拉票,希望有奇迹降臨!

徐子珊睇好師姐阿佘贏視后,自己也會投票給對方。

鍾嘉欣不急於攞視后,希望繼續努力磨練,約滿前一償夙願。

論演技,佘詩曼於「公仔箱」裏可算數一數二,早前於劇集《使徒行者》再次使出純熟演技,將臥底一角演得活靈活現,面對劇中三位母親先後離世,她又以不同層次演繹傷心程度,成功牽動觀眾情緒,難怪早於上月率先奪得《星和無綫電視大獎》及《TVB馬來西亞星光薈萃頒獎典禮2014》視后寶座,氣勢一時無兩,亦是明日舉行的《無綫萬千星輝頒獎典禮2014》候選視后的頂頭大熱。

王菀之爆冷排第4

根據無綫內部資料顯示,截至昨日為止,視后五強走勢依次序是阿佘、田蕊妮、鍾嘉欣、王菀之(Ivana)及徐子珊,當中令人驚喜的是進佔第四位的Ivana,歌手出身的她演戲經驗尚淺,但於《老表,你好hea!》中能拋開偶像包袱,以粗豪形象演活「林雪」一角,成功吸納觀眾票數。

而已掃兩獎的阿佘被外間認為根本冇對手,加上投票走勢顯然未賽先贏,但她對於再度封后有點保留,並未認同坐定粒六攞硬,她說:「邊有攞硬呢樣嘢,頒獎禮從來係咁,可能有意料之中,亦有喜出望外,就好似舊年都令人好緊張,所以平常心。(咁想唔想攞?)想!試過好多次,參加比賽個個都想贏或者有獎!」她坦言攞獎信心來自星馬獎項,認為世間沒有不勞而獲,每個演員均付出很大努力,吃了不少苦頭才走到今天,自言拍攝時心理及生理上也費盡心思。

冇壓力只怕萬一

曾多次與影后獎擦身而過的阿佘,感慨地說:「以前試過外地攞過之後香港都冇,咩類型組合都有,經過咁多年訓練,唔會畀太大壓力自己,攞到就係好禮物!我又冇乜壓力,因為拍緊套電影,可以分散壓力。(攞獎會唔會喊?)唔知,諗唔到畫面點樣,隨緣。上次攞呢個獎都相隔八年,希望當日着靚靚出席,其實我好想攞係『最佳劇集』。」

入行年資:17年

代表作:《十月初五的月光》、《金枝慾孽》、《宮心計》、《鳳凰四重奏》等。

簡評:多年來飾演的角色多元化,可塑性甚高,演活潑時夠佻脫,演巴辣時夠倀雞。2006年以《鳳凰四重奏》四個年代的四個角色勇奪視后,演技早獲認同。

熱爆指數:★★★★★

提名劇集:《使徒行者》

王菀之

熱爆指數:★★

提名劇集:《老表,你好hea!》

徐子珊負隅頑抗續拉票

憑劇集《再戰明天》角逐視后的徐子珊,面對勁敵師姐佘詩曼來勢洶洶,她仍未有放軟手腳,笑言雖然並非勝券在握,但依然會積極拉票,作為對喜歡「嘉嘉」一角的觀眾有所交代。

談到勝算有多大,子珊笑說:「平常心!我對個角色有信心,但獎項呢啲嘢唔可以強求,亦唔係我終極目標,人生都仲有好多嘢追求嘅!當然有就梗係開心!(投票投邊個?)仲使講,梗係阿佘啦!套劇播緊已經聽好多人講佢做得好,我睇咗都好認同,所以撐阿佘攞視后o架!」

入行年資:10年

代表作:《潛行狙擊》、《雷霆掃毒》、《法證先鋒3》、《My盛Lady》等。

簡評:曾歌影視三棲發展,早年於電影《跟蹤》中已備受好評,但始終專注電視圈,近年更被力捧成多劇女主角,於《再戰明天》中與吳啟華譜忘年戀。

熱爆指數:★★

提名劇集:《再戰明天》

田蕊妮撐自己冧莊隨緣

田蕊妮今年憑劇集《忠奸人》角逐視后,貴為上屆視后的她,面對佘詩曼強勢回歸,對方還率先掃下星馬兩大視后獎,明日的視后寶座可謂坐定粒六。不過,曾揚言投降的阿田,隨着頒獎禮逼近而突然轉軚,笑指會撐自己:「冧唔冧莊隨緣啦!我反而在乎觀眾鍾唔鍾意個角色,想繼續演好自己嘅戲,想撞到更多觀眾喜愛、自己又享受嘅角色,投票梗係投自己神聖一票,但亦都欣賞對手付出嘅努力。」

入行年資:21年

代表作:《巨輪》、《忠奸人》、《舌劍上的公堂》、《無雙譜》

簡評:入行多年但近年才加入無綫,演技即獲肯定,去年更憑《巨輪》奪得視后獎項,今次與同是演技派的郭晉安於《忠奸人》中扮演一對,甚有發揮。

熱爆指數:★★

提名劇集:《忠奸人》

鍾嘉欣望約滿前圓夢

入行十年的無綫花旦鍾嘉欣今年憑劇集《大藥坊》再次入閘爭逐「視后」,雖然劇中表現獲得觀眾好評,但今年視后之爭卻遇上強敵佘詩曼,令她封后的難度大增。拍劇多年,亦曾獲提名,問嘉欣是否恨攞視后?她說:「如果為攞獎工作就冇意思,對獎項一直保持平常心,順其自然。人生冇風冇浪,冇乜起跌都未必係壞事,其實已經好好,但希望喺約滿前攞到啦!仲有時間努力嘅。」

講到今年視后大熱,外間普遍認為是佘詩曼的囊中物?嘉欣說:「信心一半半啦!阿佘真係好勁,其實可以同阿佘相提並論已經係我嘅榮幸,我自己都好鍾意睇阿佘演出,阿佘嘅可塑性超強,做乜角色都神似。」

入行年資:10年

代表作:《溏心風暴》、《點解阿Sir係阿Sir》、《護花危情》、《巨輪》

簡評:通常飾演催淚慘情角色,我見猶憐,柔弱一面深入民心,但近年銳意轉型,拍下不少動作戲或女強人角色,近日播映的《飛虎II》中演活硬朗女警。

熱爆指數:★★★

提名劇集:《大藥坊》

第一手消息請下載on.cc東網iPhone/iPad/Android/Windows Phone Apps