靚靚人妻張美妮除忙於拍劇和主持工作外，還身兼餐廳和連鎖髮型屋老闆娘，不過她仍不時學習新才藝，現時愛上畫畫和音樂，又不時做手作仔，她坦言培養新興趣有助增進與家人的感情。來到秋冬季節，美妮決定學DIY秋冬護膚品，她在導師指導下，僅花半小時便製成美白補濕的護膚乳液。

張美妮製成護膚乳液後，畀個叻自己。

DIY逐格睇
用三個燒杯分別倒入冷壓甜杏仁油、奧圖玫瑰花水、1%納米玻尿酸原液。

滴入簡易乳化劑。

把之前的材料用電動器攪拌至勻。

滴入有機金盞花萃取液、高山薰衣草精油、維他命E及抗菌劑。

用電動器攪拌至勻，再倒入真空瓶即完成。

張美妮與老公黃偉強結婚一周年，但不準備大事慶祝。

踏入秋冬天氣乾燥，結婚剛滿一年的張美妮趁機自製護膚品保護肌膚：「今次係我第二次製作護膚品，第一次係同陳煒、姚嘉妮一齊主持《活得好easy》嘅時候整過潤唇膏，我都幾鍾意呢類DIY護膚品，一來係好天然，冇加化學成分，二來可以按自己喜好調配唔同味道，再加上整完又可以送畀人，特別有心思嘛！」今次美妮學整適合秋冬用的乳液，她先預備各樣材料及工具，還特別選擇最愛的玫瑰花香味，雖然大大話話有十數樣材料，但有過整潤唇膏的經驗，故她今次再整護膚品顯得駕輕就熟，在導師指導下，她按步加入材料，過程前後不用半小時，完成後她忍不住說：「整完喇？使唔使咁快呀？」她又說：「我覺得今次整乳液真係非常簡單方便，其實只要預備好所有材料，再撈勻就得，有機會下次試吓喺屋企自己整或者叫埋啲好姊妹一齊整。」

出汗助排毒

美妮更急不及待試用製成品，並狂讚玫瑰花香最合心意，問到是否打算將製成品送給老公黃偉強做禮物，她笑說：「呢個提議唔錯呀，不過我諗到最後都係自己用番，其實佢不嬲好少用護膚品，無謂送畀佢咁嘥啦！」一向注重保養的她再分享秋冬護膚心得：「我覺得冬天最重要都係飲多啲湯水，我一星期最少煲一次湯，工作太忙未必有時間煮飯，但至少煲湯滋潤吓。另外，我一有時間就去跑步，出多啲汗可以幫助排毒嘛！（老公一齊跑？）佢好懶呀！次次叫佢一齊跑步佢就推三推四！」

慶幸有老公鞭策

雖然老公不喜歡跑步，但夫妻二人最近一同迷上玩音樂，美妮透露老公一直有打鼓和彈琴，見到老公彈琴，令美妮重拾彈琴的興趣：「我細個學過吓琴，不過三分鐘熱度，好快就放棄咗，我老公成日叫我快啲練番琴，咁就可以同佢Jam歌喇！」她還有一個心願：「雖然依家練番琴唔係好耐，但係我希望將來某一年的結婚周年，可以同老公一齊喺親友面前表演，我諗會幾浪漫同有意思。」

提到家人，美妮又表示近年開始與爸爸一齊學水彩畫，兩父女自此變得無所不談：「爸爸近年退咗休，於是我就同佢一齊學吓畫畫，因為畫畫，我哋多咗好多共同話題，真係好開心可以同爸爸有呢類興趣交流。」有冇叫過老公做模特兒呢？美妮說：「我會畫自己鍾意嘅事物，好似爸爸媽媽，仲有我隻狗狗，不過我暫時就未夠膽叫我老公做Model，因為佢有時會笑我嘅畫功，我費事畫完又畀佢笑啦！等我練好啲先畫佢啦！」

雖然美妮間中被老公批評，但她很慶幸有老公時時在身邊鞭策：「有時我會好懶，又三分鐘熱度，不過有佢提住我，我先可以更加進步，所以我好多謝佢。」結婚一周年，兩口子會同家中狗狗簡單度過，對美妮而言，慶祝的形式並不重要，最重要還是跟愛人在一起。至於工作方面，她正忙於拍攝新劇《當鐵馬遇上戰車》，劇中美妮將會一改斯文形象扮演「賊婆」，原來她很喜歡挑戰演不同的角色，並叫大家拭目以待。