正受無綫力捧的陳展鵬今年憑劇集《叛逃》成為候選視帝,已率先憑該劇封新加坡視帝的他未感壓力倍增,認為獎項夾雜天時地利人和,幸運地曾經歷過,已感滿足,更感慨地說:「呢套劇係倉底貨,雪咗3年先播,如果當時乘住個勢好啲,不過依家打完底(攞獎)之後都唔驚凍!套劇係咁多套最辛苦嘅一套,減咗10幾磅,出到街已執身彩。」

陳展鵬叫祥仔和安仔畀機會馬國明稱帝。

無綫藝員訓練班出身的陳展鵬,曾効力亞視6年,及後於2008年重返娘家,繼而參與多部劇集並攀上一線小生位置。他坦言與眾多資深前輩合作,獲益良多,因而增添自信心:「呢樣嘢比攞獎更實在,其實我對《叛》劇係有信心,但最想係馬國明攞視帝,因為大家出道時間差唔多,黎耀祥同郭晉安係大熱,但佢哋都攞過晒啦!畀啲機會其他人嘛!視后就梗係佘詩曼啦!佢太犀利,個角色又難演。」