將於下星期凱旋回港開騷的樂隊Supper Moment，揚言將會大唱舊歌！剛完成內地巡演的他們，笑言在內地開騷是體能考驗，又非常感激樂迷遠道而來睇騷！

Supper Moment笑言在內地巡演後，練得「行路都瞓」的絕技！

結他手阿雞即場示範彈結他。

早前完成內地巡演的樂隊Supper Moment，下星期將回香港開騷，更為個唱取名「屋企站」，希望與歌迷開音樂Party！經過在內地出騷的奔波旅程，令四子對「家」的感受更深，故希望回到「屋企」與歌迷分享所見所聞！今次開騷他們更會大唱舊歌：「近年多數玩新專輯嘅歌，今次想試吓再玩番舊歌，Remind番自己嘅記憶。」

長期休眠

他們笑言在內地開騷絕對是體能考驗：「喺內地開騷，最辛苦就係趕車程，完咗騷返到酒店已經凌晨兩點，可能瞓兩個鐘就要起身趕車，去到下個城市又係不停重覆。」雖然休息時間大減，四子卻視作體能訓練，藉此鍛煉出最佳的演出水準！為爭取休息時間，他們笑言不但「坐住瞓」，連「行路都瞓」：「我哋除咗行上台嗰刻，即刻將全身嘅能量都用出嚟之外，其餘時間都係處於休眠狀態，唔係好講嘢，行路又慢啲咁。」

幸而付出得到回報，首次在內地開個唱的Supper Moment大獲好評：「原來我哋嘅音樂比想像中去得更遠，內地樂迷唔係完全唔識我哋。」

蒙古歌迷支持

而一眾支持者中，不但有第一次入場睇騷的樂迷，更有遠自內蒙古的歌迷，令四子大呼感動：「之前我哋喺廣州出騷，有個住內蒙古嘅歌迷就託朋友寫信畀我哋，喺北京站終於見到真人。」