黃秋生與舞台劇界猛人甄詠蓓（Olivia）明年一月再度開班教戲，秋生比喻自己是讀戲劇出身的工程師，好友劉青雲則是學徒制的大偈，讀戲可以讓人揣摩角色時減省不少時間，這次開班將會教授「一點出發、一眼關七」兩道絕招。

影帝秋生常與另一影帝好友劉青雲大談演戲經。

同是演藝學院出身的秋生和Olivia，希望以經驗為教材，傳承演戲之道。

早前與秋生一同參演舞台劇的軒仔，獲點名讚「好戲」！

黃秋生與Olivia一起接受訪問，大談演戲心得。秋生解釋何謂「一點出發、一眼關七」，他說：「一點出發係指尋找角色時，唔好諗到咁複雜，唔係話多就係豐富咗角色，可以從一點去出發。一眼關七係講喺舞台上有好多突發事，演員要開放敏銳神經，唔好死板，好多年輕演員，做做吓就變得死板，壞習慣要揼！有次我同劉青雲傾，我哋有咩唔同？我話我係讀戲劇出身嘅工程師，佢就係學徒制大偈，接到角色佢要由頭檢視，我就可以減省好多時間。」

「軒仔好犀利！」

戲劇導師跟所有老師一樣，旨在「傳道、授業、解惑」，令人少走冤枉路，林嘉欣曾說「秋生的一句點燃了我們怎樣看戲」，秋生對此謙稱：「聰明人就算見到有隻雀飛過，都可以悟出道理，唔一定係隻雀犀利！學習能力的確有高有低，好少好似軒仔（張敬軒）咁，訓練兩個月做到咁，而且愈做愈好，唔覺有壞習慣，好犀利！」

消化再傳承

至於曾奪香港舞台劇獎最佳女主角及女配角的Olivia，則更樂於教學，她說：「我鍾意教書，將我從老師學到嘅，消化後再傳承，啟發到學生，令佢有突破，我會好滿足。今次預計收約25個學生，因為全日制上七日堂，每個學生身上都要花好多時間，所以唔收得太多！」