樂壇新人Yuki Lovey曲風清新,有「港版陳綺貞」之稱,她卻不甚喜歡:「一個陳綺貞就夠,唔需要多一個!」她堅持做自己,懶理歌曲是否主流,玩音樂只為開心!

Yuki Lovey玩音樂只求開心,不刻意討好主流市場。

Yuki視陳綺貞為偶像,但不敢自稱「港版陳綺貞」。

Yuki期望創出個人風格,在流行曲中加入迷幻元素。

樂壇新人Yuki Lovey本月推出首張EP,以女唱作人身份殺入樂壇,拒絕用中文名出道的她透露為何會加上「Lovey」一字作藝名:「有日『Lovey』呢個字突然喺我腦海浮現,我查字典發現佢唔係正規英文,意思係『親愛的、寶貴的』。另外有個問題就係,如果我就咁叫Yuki,啲人喺YouTube會搵到好多個Yuki,加咗呢個字人哋就易搵啲!」

迷幻混合小清新

Yuki與台灣歌手陳綺貞同樣走清新曲風,因而被封為「港版陳綺貞」,但她聽到這個稱號後即耍手擰頭:「我唔係呀!咪咁講呀!我覺得每個人都獨特,一個陳綺貞就夠,唔需要多一個陳綺貞!我好鍾意同欣賞佢,但覺得我哋嘅歌都唔係好似啫,佢嘅歌係純結他多,我就會加啲電子。」

香港流行曲以情歌為主,Yuki的音樂卻比較非主流,但她一於懶理,拒絕為市場服務,只求做得開心:「音樂唔止流行曲,我聽流行曲大,但鍾意電子,想將流行曲結合迷幻元素,依家仲摸索緊。我冇諗主唔主流,最緊要玩得開心!」