前港姐梁麗翹（Nicole）在無綫默默耕耘，早前終於一圓坐廠做主播的心願，在跑外景的兩年間，她多次上山下海出Trip走訪災區，不過Nicole卻感激這些難得的經驗，令她擴闊視野，又希望有機會能出「開心Trip」及拍劇。

雖然多次到災區採訪，但梁麗翹認為是難得的經歷。

梁麗翹

梁麗翹希望拍電視劇，不介意演奸角和醜角。

梁麗翹為無綫節目《東張西望》擔任主持，這兩年間一直靠自己努力，終於如願「升呢」坐廠做主播，她坦言首日做直播很緊張，又感激拍檔朱凱婷不厭其煩地夾稿，並於開騷前特地為她打氣。相比上山下海拍外景，Nicole認為坐廠較舒服，但她坦言兩者都喜歡。

災區採訪唔覺苦

外表斯文的她多次遠赴災區採訪，如四川大地震、昆明恐襲及馬航失蹤等事件，她卻表示不覺得辛苦：「人哋睇得起先畀我去，我好感激有呢啲經驗，呢啲經驗冇幾多藝人做到，所以幾辛苦都覺得值得做，我一啲都唔覺得慘，因為我好捱得又唔怕蝕底，有時仲會自己要求去。」她指最深刻是首次出遠程Trip，到埃及採訪熱氣球爆炸事故：「嗰次有好多香港人遇害，見到好多殘骸、燒爛嘅衫、波鞋同血，真係冇諗過呢啲悲劇會喺面前活生生出現，每次講番都起雞皮，但我唔驚，我會以家屬嘅出發點去諗，同佢哋一樣咁唔開心。」她又笑言希望日後能去「開心Trip」，例如拍攝旅遊節目：「我唯一嘅興趣係去旅行，好鍾意去睇唔同嘅嘢，最想係去希臘，希望將來喺嗰邊度蜜月，因為嗰度啲白色小屋好靚。」

唔介意做醜角

加入無綫已三年，恨拍劇的Nicole，坦言不介意客串任何奸角或醜角，問到可會接受行性感？她笑說：「性感同我唔係好扯上關係，識嘅人都覺得我係傻大姐，如果有好嘅身材我都唔介意展露，當然係有工作需要先得啦！但我覺得自己未夠Fit，好想練出『馬甲線』。」