入行二十多年的黃智賢（Ben）早憑《真情》入屋，但人生變幻無常，他曾經歷長時期的事業低潮，幸他未有停留谷底，努力不懈的他近年再次彈起，成為電視界的實力派演員！

有老婆全力支持，Ben將放膽向喜劇之路出發。

Ben在娛圈浮沉廿載，只想做好本分，成為觀眾心目中的稱職演員。

雖然曾處於低潮，但Ben選擇以正能量抵抗抑鬱：「都係咁過啦，都要過日子！冇嘢做嗰陣就畀多啲正能量自己囉！」為擺脫負能量的陰霾，他將忙碌填滿生活：「有唔開心就難免嘅，我會搵其他嘢做，令自己Keep住忙！運動就係其中一個好方法，直頭可以抗抑鬱！」

入行多年的他坦言剛返回TVB時非常失落：「啱啱返嚟嗰陣缺乏肯定，監製明明識你，又唔願意用你，對你冇信心，我惟有唔揀擇，乜都試，證明畀人睇我仲好Fit同好稱職。」

回巢初期工作量大減，難免Ben會鑽牛角尖：「我嗰陣諗，點解咁多人讚你好，都冇人搵你開工呢？令自己心情都幾低落。」不過他很快便看開，重整步伐：「但我慢慢學識唔好問咁多點解，因為人嘅際遇真係各有不同！你要下下去計較係咪公平真係好煩，我會認定人生係一場長途賽！」

感激老婆支持

對於老婆一直以來的支持和鼓勵，他心存感激：「最令我感動係佢從來冇強迫我做任何嘢！由相識到依家都係，我諗呢個就係最大嘅支持！」並指老婆只會關心他有份拍攝的劇集：「佢只追我有份拍嘅劇，其他唔睇，呢樣都好明顯！不過佢好口硬唔會輕易讚我，但係我知佢會留意，有時聽到佢嘅朋友讚我做得好佢又會開心，講番畀我聽，就好似經人哋把口去讚我！」

至於將來的演藝生涯規劃，Ben希望有機會拍喜劇：「好想拍喜劇，好耐冇拍過！而且我覺得社會嘅氣氛都好需要喜劇！加上啲觀眾都以為我好嚴肅，但熟我嘅都知唔係，好似有待發掘咁！」

Mark實子華阿田

他希望能與黃子華及相識十多載的田蕊妮合作，爆發喜劇細胞！他亦感激圈內有一班好兄弟及賞識他的伯樂：「最想多謝畀機會我嘅監製、珍姐！幕前就係嘉穎同曹永廉，我哋識咗好多年，好好兄弟，佢哋好支持我，會為我開心！我最想同呢兩個好兄弟合作，但係好少有咁嘅機會，希望之後有啦！」

演過無數角色的他認為《食為奴》雍正一角有深遠意義：「呢個係我做咗好多配角之後，自己都諗住冇所謂啦，都慣咗，點知突然畀我上番主角位！我知道演員嘅路好長，可能有一日未必會係主角，我覺得只要大家認同我係一個好演員就已經足夠，但《食為奴》真係上天對我嘅恩賜！」