陳慧琳昨日出席活動時被問到已沒有大星出席今年的樂壇頒獎禮，她認為其實可以取消頒獎禮，或是取消最受歡迎男女歌手獎項，頒金曲即使只頒五、六首都可以。

陳慧琳談到樂壇頒獎禮及「男女歌手獎」，自有一番見解！

恨抱孫的陳寶珠連抱公仔的手勢都似在抱BB！

陳慧琳與陳寶珠出席活動，率先感受聖誕節氣氛！

陳慧琳（Kelly）昨日出席活動時被問到有關陳奕迅和容祖兒都不會出席今年的樂壇頒獎禮，被指已經沒有大星出席，對此她說：「好多年啦！其實可以取消，不過冇咗嘅話，新人就會冇機會表演，總會有人睇。（你睇電視有冇記得邊個新人？）如果靚同歌好聽會留意會記得，好似AGA首《一》！（但冇晒大星？）都冇辦法，市道唔好，唔好夾硬整歌，整好啲歌先出碟，我都計劃緊出碟。（你都唔會出席頒獎禮？）好多年冇去，留番啲機會畀新人。（咁咪冇人有資格拎男女歌手？）取消囉！唔要都冇所謂，Of Course！點解唔可以？頒十首歌，頒五首、六首都好，或者頒最有前途新人獎都OK，有鼓勵都好，唔可以冇鼓勵。」

陳寶珠鍾意抱孫

此外，Kelly透露聖誕節會留港跟家人和朋友慶祝，未買禮物給囝囝和丈夫，問到囝囝會否爭禮物？她說：「細佬會揀先，但見到哥哥嗰啲又想要。（買同樣嘅禮物？）可以，不過覺得戇居，唔想！哥哥多數讓細佬，唔會扭，呢樣幾好。老公同囝囝三仔爺送咗盒特別版朱古力畀我做聖誕禮物，都好開心。」問到追討拖欠代言酬勞一事，她說：「真係做咗十幾廿年第一次收唔到數，以前聽啲演員話收唔到錢，依家終於知道係咩感覺。」

同場的陳寶珠被問到是否恨抱孫時表示隨緣：「唔可以催，等上天安排，佢哋有計劃。我鍾意抱孫，但唔知幾時中，唔心急得，愈急愈有壓力。（休息吓準備抱孫？）講緣分，有嘅更加要做多啲，做完就幫手湊孫。（鍾意仔定女？）我鍾意女。」又透露聖誕留港，會探望師傅白雪仙。