藝人陳琪早前再度懷孕，本想為老公胡諾言添個男丁，卻不幸小產，她接受人工流產手術期間流血不止，更有可能要切除子宮，陳琪雖然在最後關頭保住子宮，卻不能再生小朋友。

不幸小產的陳琪要看中醫調理身體，老公胡諾言陪伴在側。

胡諾言既陪老婆睇中醫又到街市買餸，認真廿四孝！

與胡諾言育有兩女的陳琪，早前不幸小產，醫生不建議她再生小朋友。

現年40歲的無綫藝員陳琪與老公胡諾言（胡仔）結婚5年，育有兩名分別5歲及2歲的女兒，由於胡仔一直恨仔，陳琪早前再度懷孕，滿心希望一圓老公心願，豈料卻意外小產，她說：「舊年11月我意外有咗，但有日開廠唔舒服，去到醫院已經見紅，留院一照，發現BB已冇心跳，醫生安慰我『可能BB未Ready嚟呢個世界』，我接受到，仲問點樣攞番BB出嚟，醫生建議自然排出，但等咗兩星期都冇動靜，好唔正常！」其後，醫生建議她接受人工流產，並表示手術需時約15分鐘，但當陳琪醒來已是三小時後，她說：「我感覺張床單被我啲血染濕晒，食凝血藥後又嘔又暈，血壓跌得緊要，醫生話要搵個高級外科醫生幫手，六點前搞唔掂要切除子宮，我感到前所未有咁驚！」

大女「知知哋」

幸陳琪在最後關頭保住子宮：「醫生喺六點鐘放氣球入我子宮，幫我止血，算係保住個子宮。但醫生話風險太大，唔主張再有小朋友，但老公好失望，佢一直恨有個仔。」她又指本來打算追究，但最後打消念頭。樂觀的她現在更珍惜兩個女，而大女亦似乎對事件「知知哋」：「等佢兩個大啲，我會同佢哋講番。」而一直恨有兒子的胡仔坦言失望：「真係好失望，醫生話冇切子宮，但都等於切咗。」

睇中醫調理

雖然胡仔不能如願，但依然對老婆愛護有加。日前，他陪陳琪到牛頭角睇中醫調理身體，為免太太操勞，胡仔親自排隊，讓老婆舒服地坐在私家車上等候。而等中醫期間，他又去買餸，並不忘購買陳琪最愛的缽仔糕，然後返回中醫館繼續等，約大半小時後終於輪到陳琪，胡仔即細心接她睇中醫，其後再齊齊接女兒放學。

婦產科專科醫生余啟文表示，孕婦日後再度懷孕的話，母子任何一方存在極大風險，有可能是兩大原因：「如果之前孕婦進行人工流產時子宮受損而穿窿的話，再懷孕就會有子宮爆裂嘅危機。另外，假如孕婦嘅子宮壁變薄，再度懷孕時胚胎喺同一個位置的話，有可能再次出現胎盤植入嘅情況。」