蘇康搏盡養家 雲頂撲多80萬
明日迎娶圈外女友馮翠珊（Anita）的蘇永康，婚前搏盡密密登台吸金，更將工作排到婚禮前一天！他前晚在雲頂登台即賺80萬，心情亢奮的他公開多謝任賢齊及梁漢文，並大讚準蘇太「好勁」，全盤策劃婚禮！
早前拉隊到美國拉斯維加斯影婚照的蘇康與女友Anita，將於明日展開人生新一頁。
蘇康臨近婚禮依然四出搵銀，實行「為你賺足多袋金」！
蘇永康（蘇康）明日在港豪擺百萬婚宴迎娶拍拖八年的未婚妻Anita，為令婚禮搞得有聲有色，準新郎婚前盡地一搏，密密出騷搵真銀！繼早前與BIG FOUR遠赴美國拉斯維加斯舉行巡唱後，前晚他與梁漢文（Edmond）、任賢齊（小齊）及黃家強組成「男人幫」到馬來西亞雲頂舉行《男人幫雲頂演唱會》，完成婚前「最後一唱」，80萬港元袋袋平安！司儀指除蘇康外，其他均已成家立室，蘇康即大呼：「我三日後就結婚！」
小齊視作搖錢樹
司儀笑言蘇康為歌迷扔低新娘子，蘇康即作雙語廣播及感謝唱片公司老闆任賢齊：「我係為咗頭家，因為養家辛苦，但老闆好好，畀好多工作我，因為擺酒要用好多錢。人與人之間嘅相識好奇妙，我哋十幾年前拍《星願》識，冇諗過佢會做咗我老闆，冇佢幫我出唱片就唔會有《那誰》呢首Hit歌。」小齊即笑說：「我當咗你係搖錢樹！」蘇康又羨慕對方身形：「想好似你咁瘦，結婚嗰日着衫會靚啲！」他又感激好兄弟Edmond出心出力：「佢真係唔話得，做完今晚，聽日又返內地做騷，再趕返香港幫我做兄弟。」據知蘇康為吸金而將工作排得密麻麻，亦未有時間開P告別單身，更不惜犧牲睡眠時間，完騷後即趕搭早機回港，工作排到婚禮前一日！將婚禮全盤交託老婆Anita的他大讚對方：「工作太忙冇時間搞婚禮，差唔多佢搞晒，佢真係個勁女人！今晚係婚前最後一個演唱會，嚟緊人生會有新開始，希望做埋今晚會以男人幫身份再嚟。」說罷即落台與歌迷互動，並獲女粉絲攬實錫錫，雖然「男人幫」首次出騷，但門票於馬國火速售罄，故四子有意再合體。
超豪婚紗到手
至於Anita接受本報訪問時指全人手訂造的Alexander McQueen婚紗已於日前抵港，連同另外兩套獨一無二的高級訂製禮服總值逾百萬元！她笑言與蘇康「忙到甩轆」：「佢星期一先返港搞婚禮啲嘢，冇得抖，我婚禮後抖一日就飛內地公幹。可能搞得Event多，當正Event咁搞，未去到好緊張嘅地步。」她希望婚禮形式似朋友聚會：「想嗰晚可以行去同每個朋友傾到偈，加多套衫，方便同朋友玩！」
聽朝11點開波 尖咀運「吉」
日期：十二月二日
地點：尖沙咀洲際酒店
上午 11:00-11:30：蘇永康率兄弟團接新娘
中午 12:10-12:40：花車於尖沙咀行大運，經酒店、碼頭、紅館再回酒店
下午 2:15-2:35：於酒店舉行結婚註冊儀式
下午 5:15-5:35：一對新人於酒店Ballroom的大樓梯會見記者
晚上 8:00：準備進場，嘉賓入席
