「夥計，熱啡、菠蘿油！」回想以前每次聽到老竇落「柯打」時，心中都會有個祈盼，希望自己可以快點長大，然後一嘗這神秘的飲品。兒時對咖啡的渴求，原來是對成長的迷思，但誰曾想到咖啡的苦澀正是預言着不那麼甜美的人生。歌手江海迦（AGA）與咖啡的故事，一開始亦是伴隨着許多疲累和挫折，但只要學會品嘗苦澀，原來人生與咖啡一樣，可以有更多選擇！　

AGA從討厭咖啡到愛上咖啡，不單單是喜好的改變，更是一種成長。

AGA跟Napolia學拉花有成，原來製作過程要非常精準。

Coffee Corner

磨咖啡
「要用18g至22g嘅咖啡豆磨成粉，然後壓平。」

打奶泡
「用62-64度嘅蒸氣打奶泡，將蒸氣棒放到牛奶入面，然後利用蒸氣將空氣帶入牛奶之中，形成泡沫。」

Latte
「如果用嚟製作Latte嘅話，大概需要1厘米厚度嘅奶泡分量。打完奶泡之後，亦要轉動牛奶杯，令奶泡更加幼滑。」

拉花
「一定要留意奶柱嘅穩定性，而且喺拉花嘅過程中，亦要適度地搖晃牛奶控制流速，從而形成花紋。同時，將牛奶倒入咖啡杯時，杯身一定要傾斜，而且速度要快。當注入奶泡時就要搖晃牛奶，並且貼近咖啡表面。」

畫花
「喺咖啡表面畫花時，要注意畫花筆一定要尖細，同準備一塊乾淨嘅濕毛巾，每畫一筆後要立即將畫花筆抹乾淨。」

由討厭到喜歡，有時欠的只是一個契機和理由，AGA自小十分排斥咖啡，甚至不懂為何會有人喜歡喝這種裏裏外外都毫不討喜的飲品：「其實我由細到大都唔鍾意咖啡嘅味道，甚至連聞到都覺得討厭。尤其我以前做空姐嘅時候，每一日都要沖咖啡，其實都幾難頂！」後來AGA遇到喝咖啡的契機，而她人生的第一杯咖啡便是最苦的Expresso：「辭咗空姐份工之後，我就開始學作曲，所以嗰陣時日頭要返工，夜晚又要作歌，一日24個鐘對我嚟講根本唔夠用，所以就要靠咖啡提神。當時聽講Expresso係最有效又係最細杯，所以一開始就係飲Expresso。」咖啡的苦澀在口中久久不散，慢慢AGA便習慣了那種苦的滋味：「其實當時對咖啡一啲感覺都冇，只係覺得佢幫到我提神先會飲，但估唔到慢慢習慣咗咖啡嘅味道，於是開始試其他種類，例如Latte同Cappuccino都係我依家嘅最愛！」

一杯咖啡　爆發靈感

創作的過程往往是孤身一人，寂寞就好像必要的元素，而咖啡便陪伴AGA度過許多個這樣的日子：「投入創作歌曲時我都會好專注冇咩雜念，以前試過為一首歌填Demo、作詞、編曲等，於是一口氣坐咗13、14個鐘頭冇郁過！於是你就會發現，當你好鍾意一樣嘢嘅時候，你會完全冇晒時間觀念。」而現在咖啡對她來說，已變成放鬆的方法之一：「依家咖啡對我嘅意義其實係一段放鬆嘅時間，因為創作係要靠靈感，所以喺冇靈感之際，我會選擇出去飲杯咖啡沉澱一下。」

一個拉花　九分耐性

第一次跟咖啡師李恩霖（Napolia）學咖啡拉花，AGA覺得原來咖啡表面上小小的一個圖案亦充滿學問：「我一直都好想學拉花，之前亦試過用一般咖啡提供嘅牛奶去試吓拉花，但當然失敗啦！我今日先知道拉花要首先打70%嘅奶泡，而且力度、奶泡嘅分量、拉花嘅手勢等都要配合得好，先可以成功喺咖啡上面畫出一個靚嘅圖案，所以一啲都唔簡單！」自言喜歡挑戰新事物的她，亦分享了以往的學習心得：「我去學一樣嘢之前都會有心理準備，因為其他人用咗咁多時間去培養嘅事情，我冇可能會一兩日就學識，所以我會一步步去學，唔會搵捷徑，而且我相信每一樣事情都一樣，基礎都需要慢慢打好。」