女神周秀娜接受新一期《好報》專訪時透露，斥資八位數字打造內衣王國，向來食腦的她早前巧遇韓國人氣組合少女時代前成員Jessica時，力邀對方參與內衣設計，實行打「女神牌」，連韓國市場都唔放過！

娜姐接受《好報》專訪，大談榮升老闆娘的感受。

周秀娜

明年踏入30歲的周秀娜諗頭多多，於昨日出版的《好報》透露自約滿內衣代言人後，自己另起爐灶於年底推出自家內衣品牌「LaaNaa」，她希望兩年後可以進駐中環買億元舖，更定下目標想五年後上市，打造內衣王國，她更親自做生招牌，解禁咪咪，破罩而出！

今次斥資千萬元搞新品牌，娜姐揚言不成功便成仁，除希望物色中外知名模特兒或女星代言外，亦望邀得猛人Crossover，參與設計新Bra。娜姐早前於活動上巧遇韓國女神、少女時代前成員Jessica，一見如故。據知，擁有自家設計眼鏡品牌的Jessica向娜姐送贈券，娜姐打蛇隨棍上力邀曾在美國讀時裝設計的Jessica參與內衣設計，希望有錢齊齊搵。

大讚有生意頭腦

本報記者致電娜姐，問到是否邀Jessica加入設計團隊或搞Crossover？她說：「當日同佢傾咗好多嘢，講扮靚心得之餘，仲問佢有冇興趣參與設計我嘅內衣品牌，佢話可以坐低慢慢傾。」娜姐謙稱自己未到女神級，Jessica才是真正女神：「佢真係好靚，又有生意頭腦，係智慧女神，如果可以搵佢合作，可以打入埋韓國市場！」至於有否與Jessica傾價錢？娜姐笑說：「我哋講心唔講金，如果講金，我諗真係好貴，惟有自己慳住使！」

唔係叫你剝就剝

入行近七年的娜姐於《好報》專訪中，還將娛樂圈的潛規則娓娓道來：「我唔敢講自己好聰明，但入得呢行就要清楚自己做緊乜，每一步都要計劃，唔係人哋叫你剝就剝，剝都要有Point，過往都有唔少飯局同神秘電話搵我，但我只係一個模特兒同演員，呢啲嘢唔包，Sorry！」

談到會否欽點接班人？娜姐認為「周秀娜」只得一個，無人能代替，並覺得於圈中最緊要是做番自己。