網絡紅人杜小喬因扮演港女及「娘娘」角色而深受網民歡迎，出街仍被人叫「娘娘」的她坦言有點受寵若驚！入行除令她性格大轉變，更威到連張智霖的MV女主角都做埋，她又透露揀男友最緊要乖！

小喬坦言入行後令她自信心大增。

單身的小喬自爆有心儀對象，並希望搵個乖乖男友。

小喬早前為Chilam的MV擔任女主角。

熱爆網絡的杜小喬憑在網絡短片扮演港女及娘娘的角色而引起網民注意，問到對於「娘娘」此榮銜的看法時，她坦言受寵若驚：「有時喺街度有朋友叫我做娘娘，我都會唔知點畀反應，跟住我就會話叫我小喬得啦！呢個只係一個角色名，我暫時未有咁勁可以做到娘娘！」

入行增自信

一副鄰家女孩外貌令小喬成功俘虜不少網民的心，因而連續兩年獲選為十大網絡女神之一，更有幸成為張智霖（Chilam）的MV女主角，她亦大讚Chilam：「佢一嚟到就勁有禮貌咁同我打招呼，搞到我唔識反應！Chilam見我好緊張仲大叫『加油啊小喬！』佢簡直係我男神！」

小喬今年跳出網絡界，簽約經理人公司正式闖娛樂圈，她笑言入行後自信心大增：「以前嘅我一定冇可能講咁多嘢，可以做到以前覺得唔會做到嘅嘢，依家做到之餘又有人欣賞你，令我信心大咗！」目前單身的她自爆有心儀對象，又希望有個乖乖男友：「一定要乖同對家人好，肯花時間喺屋企人身上，一個好嘅女朋友係基於有一個好嘅男朋友！」