余文樂昨日透露新戲角色有情緒病，更指精神病是演員的職業病！他揚言不怕患抑鬱：「我本身都『彎彎』哋！」至於將拍鬼片的劉心悠則怕到「大酒店」取景，要搵人陪去廁所。

樂仔怕被新戲角色影響，要鬱鬱寡歡過聖誕。

心悠聖誕將首次化「爛面妝」扮鬼。

心悠與樂仔在活動上歎咖啡。

余文樂和劉心悠昨日在尖沙咀出席咖啡品牌聖誕活動，將於工作中度聖誕的樂仔透露，新戲角色有情緒病：「其實好驚畀呢啲戲影響自己心情，變咗呢個聖誕節會比較沉重。」他更笑言角色似自己：「我覺得演員都有精神病，我覺得呢個係職業病。」問會否怕有抑鬱症？他笑說：「冇得驚，佢哋話我咁後生，醫到嘅！」他又指會搵定醫生傾偈：「你話Stand by醫我？算啦！我本身都『彎彎』哋！」

免費拍戲撐新人

為支持用政府資金拍戲的新導演，樂仔首次破例免收片酬：「我好鍾意個古仔，基本上所有演員都冇收錢。」問到是否要挑戰演技？他笑說要挑戰自己荷包：「如果我收佢錢，套戲就唔使拍喇！」問到會否投資？他笑指不會：「你搵古天樂啦！」

心悠搵人陪如廁

至於同場的心悠則表示，聖誕要拍吳家麗執導的鬼片，將與蔡瀚億（Babyjohn）合作的她笑言拍鬼片唔恐怖：「拍嗰時好多人喺度！」但首次化「爛面妝」扮鬼的她到「大酒店」取景時，或會找人陪去廁所。希望在聖誕節前後抽時間與好友慶祝的她，大呻去年朋友交換禮物時出術加「冇Heart」，所以今年要有限制：「做化妝師唔可以送化妝品，髮型師唔可以攞Spray嚟！」而價格上限亦由300元增至500元。