安仔阿佘雙料帝后馬國出爐
無綫視帝視后將於下月15日揭盅，被喻為台慶前哨戰的《TVB馬來西亞星光薈萃頒獎典禮2014》昨晚在雲頂舉行，賽前大熱郭晉安及佘詩曼先拔頭籌，榮膺雙料視帝及視后！至於劇集《使徒行者》則橫掃12個獎項，成為大贏家！
演技精湛的安仔與阿佘大熱勝出，有望再於下月的台慶頒獎禮稱帝封后。
再度合作的細細粒與Bob遠赴雲頂表演，載歌載舞！
與視后無緣的嘉欣獲頒「最喜愛TVB電視角色」，雖敗猶榮！
原本胸有成竹的陳展鵬未能稱帝，未知有否打擊下月競逐台慶視帝的戰鬥力呢？
昨晚在馬來西亞雲頂舉行的《TVB馬來西亞星光薈萃頒獎典禮2014》（前名：《Astro我的最愛頒獎典禮》），無綫小生及花旦包括佘詩曼、郭晉安、鍾嘉欣、徐子珊、黃宗澤、楊怡、羅仲謙、陳展鵬及馬國明等盛裝出席鬥餐飽。由於頒獎禮一向被視為無綫《萬千星輝頒獎典禮》的前哨戰，是無綫視帝視后的指標，加上今年頒獎禮賽果由逾20萬人投票選出，故備受矚目！
「釘姐」賣口乖
回巢TVB拍劇的阿佘憑《使徒行者》的「釘姐」一角人氣急升，出色演技掀起全城熱話，更獲睇高一線爭奪視后！
穿白色綴花晚裝的視后大熱阿佘，孖實視帝大熱之一的陳展鵬打頭陣亮相，上月憑《使徒行者》在《星和無綫電視大獎2014》封后的她，成功再下一城，揮低另一大熱鍾嘉欣奪得「最喜愛TVB女主角」，她在台上風騷地說：「差唔多兩年冇拍過劇，好驚你哋唔記得咗我，但你哋冇！」又大爆拍劇的辛酸史：「軒仔（沈震軒）又受傷，好多人亦都唔舒服，但係大家都咬緊牙關完成，因為背後嘅動力有你哋！」她更賣口乖叫觀眾繼續支持TVB，而早在頒發「視后」前，她已憑「釘姐」勇奪「最喜愛TVB電視角色」，以大熱姿態榮膺雙料視后！
另一邊廂，安仔在《忠奸人》奸到出汁的表現令人眼前一亮，成為視帝的頂頭大熱，與陳展鵬對撼爭做「馬國視帝」！呼聲甚高的安仔先憑《忠奸人》的「高哲行」一角奪得「最喜愛TVB電視角色」，其後再勇奪「最喜愛TVB男主角」成為雙料視帝！出發前曾放風恨攞馬國視帝的他，甫上台即激動大呼：「多謝！」他先後於2003及2005年憑《戇夫成龍》系列的「阿旺」一角稱帝，今年再度跑出，三度稱帝的他連講兩次「好驚」，又自爆曾喪喊：「我拍嗰時唔係為獎而做，拍完反應熱烈，就覺得有啲機！尤其係當TVB同事讚我，我即刻入廁所喊，係開心到喊！」他又多謝家人，並笑說：「返到屋企冇用奸險表情對住佢哋o架！」
《使徒行者》贏開巷
另一備受關注的「最喜愛TVB電視劇」由話題之作《使徒行者》奪得，該劇成為昨晚的大贏家，共囊括12個獎項，可謂眾望所歸！而大會今年新增「星光成就大獎」，表揚多年來為演藝事業付出的前輩，由劉江及羅蘭奪得。另外，馬國明獲頒「最喜愛TVB電視角色」並發表得獎感言時，直播頒獎禮的無綫娛樂收費台突然訊號受干擾，畫面出現「節目即將恢復播映」的字句。
