「視帝」大熱郭晉安與陳展鵬昨日率先在機場「交鋒」，兩人均對稱帝信心爆棚！而「視后」熱門鍾嘉欣亦準備充足，勁敵佘詩曼則低調入閘，似乎想養精蓄銳！

戴超晒V的安仔相當得戚，一副「實食冇黐牙」的樣子！

整裝待發的展鵬被女粉絲密密包圍，聲勢贏晒！

詩韻（左）與嘉欣未出發先興奮，未知能否「滿載而歸」呢？

郭晉安、陳展鵬、鍾嘉欣及李詩韻等昨日現身機場，準備到馬來西亞參加今晚舉行的《TVB馬來西亞星光薈萃頒獎典禮2014》，「視后」熱門佘詩曼則低調入閘，未知是否想抓緊時間上機休息，留前鬥後呢？

心情緊張的安仔對「馬國視帝」充滿信心：「今次有可能。（有信心？）會有嘅。（勁敵？）好勁個個都！」他表示家人未有同行，因子女要上學，問到若獲獎會否與家人外遊慶祝？他說：「攞唔攞獎新年都會去旅行。」同屬「視帝」大熱的展鵬喜獲近20名女粉絲到場支持，他指早前於《星和無綫電視大獎2014》稱帝為他打下強心針，有望再下一城：「希望啦！（勁敵？）邊個攞都開心！（有信心？）有囉！」他因時間緊迫，昨日才張羅戰衣，頒獎禮後要趕赴上海拍無綫劇《張保仔》。

嘉欣密實迎戰

另一邊廂，「視后」熱門鍾嘉欣有份提名亦有份獻聲：「OK緊張，帶咗條好靚嘅長袖裙去，包到實嘅，因為嗰邊比較凍，我仲要表演唱歌，所以着得穩陣啲！（捧獎有勁敵？）個個都好好！（有信心？）OK啦！」她指早前到當地拉票感受到觀眾的支持，故今次出戰特別有歸屬感，獲多項提名的她有機會成為「多料」得獎者。李詩韻則會性感上陣：「好開心，好想食貓山皇！（戰鬥格？）靚得嚟少少性感。（有信心得獎？）我淨係諗住貓山皇咋！」