歌手梁佑嘉近年頻頻北上拍戲及拍劇,早前回港放假的她趁機一圓武術夢,學習李小龍最耍家的雙節棍。外表斯文的她,骨子裏原來是一名打女,自小與弟弟打交當食生菜:「我性格好男仔頭,我細個唔係玩毛公仔,而係搵我細佬扮楊過,我扮小龍女,一齊切磋武功!我會將報紙摺成一把劍打交,依家大個好想揸一樣武器嚟學,最後就揀咗雙節棍。」

外表斯文的Abella努力練習雙節棍,希望他日能與男友拍住拖比武。

對武術男情有獨鍾的Abella,大讚劉教練有型而且功夫勁。

奪命四式
射棍勢

移花接木

翻越嶺

蘇秦背劍

練到周身瘀

學耍雙節棍半年的Abella,一日通常會練習六小時,弱質女流毅然闖入「刀光劍影」的武俠世界,周身瘀傷在所難免,她說:「開頭學會用海綿棍,熟手之後就用番真棍上陣,所以周不時會成身瘀晒,最驚險一次係成支棍打落塊面度,好彩避開晒啲骨位,只係打咗落面珠!如果唔係實會破相,要入醫院做手術!」傷痕纍纍的她曾經掙扎過應否半途而廢,最後她決心向打女路線進發,希望將來在電影上發揮所長。

情傾肌肉男

Abella大讚劉教練有型兼功夫了得,並自爆鍾情武術男,他日若找到有相同興趣的男友,屆時有另類拍拖好去處:「識功夫同埋武術嘅男仔係有吸引力啲,至少覺得安全感大啲!如果我都學埋,大家可以切磋,平時行街、食飯、睇戲咁悶,你好少聽到情侶話去打番場功夫先。」

打得之人身材自然不易走樣,偏愛肌肉男的Abella坦言會大大加分:「武術男仔好Fit、好敏捷,唔好太爆肌,有少少肌肉覺得OK!其實女仔識功夫都幾好,可以保護自己,但男仔就唔應該利用武術嚟打另一半。」

恨自創招式

她又透露學棍初期最難是協調左右手,因為本身少用左手,難以控制感覺,不過日子有功,現在有姿勢有實際的她想挑戰武術比賽,更希望自創獨門的「Abella招式」:「雙節棍好似跳舞咁,都會有自創招式,有時做做吓可能會問師傅意見,可能耍耍吓會加動作,希望嚟緊有Abella式啦!」

奪命四式

雙節棍招式花款多不勝數,Abella為大家示範入門四式,趁機展示學習成果!

射棍勢

雙手放在胸前方,前後持棍,前手略向身體傾斜,雙腿緊紮四平大馬,作用是突擊對手臉部。

移花接木

雙手於腰前交叉,握實雙節棍,用手指控制棍身,將棍放在腰間兩邊借力互擲,作用是令左右手更靈活,有利承接其他招式。

翻越嶺

挺腰站立,雙手握棍,再鬆開左手,右手握棍從身後向前打出弧形進擊,作用是擾亂對手視線。

蘇秦背劍

右手握棍,左手鬆開,右手運勁向前下揮,棍到盡頭時再環繞一周揮至右肩,左右手交替練習,訓練方向感,作用是從上而下攻擊對方頭、面及手腕。