林盛斌（Bob）昨日出席《長隆海洋王國 X OK便利店合作》發布會，席間與觀眾大玩遊戲。談到台慶夜出手相助，促成王祖藍向李亞男求婚，他笑說：「事前忍得好辛苦。（婚期定咗明年2月14日？）佢淨係話叫我度一日畀佢，（婚期）我都係睇報紙先知，應該啱喇！（送咩禮物畀一對新人？）講真，錢我唔夠祖藍多，所以送生女秘方畀佢。」對於網民抨擊祖藍求婚「搶收視」，Bob表示有留意報道，並無奈地說：「大家諗嘢簡單啲啦！應該衷心祝福，佢哋係天作之合嘛！」而同場的孫敬安談及早前與鄭多燕的合約糾紛仍怒氣未消，誓要追究到底。

Bob出席活動時與觀眾打成一片。

雖然不肯透露婚期，但亞男仍冧爆晒鑽戒。

亞男的父母前晚亦有現身女兒位於大埔的「愛巢」。

另一方面，準新娘李亞男前晚現身大埔的「愛巢」，離開時三緘其口，不肯透露確實婚期，只着大家「靜待佳音」。