樂壇紅星前日（周六）現身倫敦，參與《Band Aid 30》慈善籌款，灌錄經典歌曲《Do They Know It's Christmas?》的新版 ，齊心對抗世紀疫症伊波拉，靚聲天后Adele唔畀面，遭活動發起人「樂壇教父」Bob Geldof鬧爆，寸她冇嘢做都唔接電話！

《Band Aid 30》活動以幫助西非國家對抗伊波拉為主題，Bob Geldof的善心一呼百應，錄音陣容由新生代歌手撐起，包括性感天后Rita Ora、俊男組合One Direction（1D）、Ed Sheeran、Ellie Goulding、Emeli Sande、Paloma Faith等，聯同Bono、Chris Martin、Sinead O'Connor等歌星，齊集Notting Hill的錄音室，但被指巨星唔多，陣容比30年前的《Band Aid》弱得多。

冇嘢做唔聽電話

其中一位「唔畀面」的大牌歌手是26歲的靚聲天后Adele！Bob接受訪問時不滿地爆粗鬧人，指Adele明明冇寫歌、冇錄音，但完全不聽電話，又不打給經理人，寸她掛住專心湊仔不想被人煩，又指有人以為行出來做嘢都沒用，這樣的想法是錯的。

不過，Adele的發言人否認她甩底，堅稱Bob和主辦單位曾直接跟她傾過，但她從來沒有答應錄音，又指她關注伊波拉，已捐款給樂施會做抗疫計劃。消息透露，Bob等人曾致電Adele百次都沒有人接聽，不清楚她會否出席，其他參與錄音的天王天后級歌手對Adele缺席也大感詫異。

1D表現好打頭陣

被激親的Bob不忘力讚Ellie Goulding和Emeli Sande靚聲不比Adele差，做得好好，又讚賞1D的表現，由他們負責唱開場部分。《Do They Know It's Christmas?》新版歌詞由Bob撰寫，他在訪問中形容伊波拉是「反人類」的病，與原裝版本相比，歌詞作出少許改動，以帶出伊波拉這個疫症之可怕，講親吻及眼淚都能致命。他稱見過一名西非護士抹去垂死病童眼淚的照片，結果兩人都死去，深深打動了他，呼籲大家付錢買歌以示支持。此外，Bob稱英國財相歐思邦（George Osborne）答應這張慈善單曲CD收益免稅，百分百用來抗伊波拉。由周一開始，歌曲可從網上下載，收費99便士（約12.3港元），而CD定價4英鎊（約50港元），預計可籌得數以百萬鎊的善款。