安志杰追JC幾日就過夜
影星安志杰與混血女模Jessica C.（JC）前日被本報拍得雙雙從男方寓所步出，共度春宵當場斷正！「杰C戀」曝光，JC大無畏爽快直認，而安志杰昨日談起女友時尷尬又怕醜，並自爆「杰C戀」只開始了幾日，更暗示要追JC話都冇咁易：「美國人好Easy！」
安志杰帶與婷婷拍拖時一起養的愛貓出席活動。
樣靚身材正的JC與安志杰可謂郎才女貌。
安志杰不時抹汗，講女友真係咁緊張？
抱着女孩的安志杰一副冧樣，未知是否想做老竇？
安志杰與「警鐘胸」女模Jessica C.被《好報》踢爆因合作電影而撻着，前日二人從男方寓所步出。
今年5月，安志杰與「警鐘胸」女模Jessica C.被《好報》踢爆因合作電影而撻着，前日二人從男方寓所步出，全程冧爆，其後JC大方承認與安志杰拍拖，原來她到男友家度春宵前，更前往九龍區拍拖睇戲，全程又攬又錫，態度親暱。雖然拍拖短短幾日，但鬼妹仔性格的JC已到男友寓所過夜，戀情進展真係快過打針。
碰埋就撻着
而安志杰昨日帶同與謝婷婷拍拖時一起養的愛貓出席商場活動，人逢喜事精神爽的他被問到與JC的戀情時，全程尷尬及怕醜，更緊張到不停低頭踱步，他承認與JC開始了幾日，又大讚女友乜都好：「大家識咗一年，嗰時係拍戲識，當時我比較怕醜，佢為人好開心，個性又爽直。（傳係JC追你？）係互相嘅，碰埋就撻着啦！（佢有咩吸引你？）好多嘢，特別係性格。（咁身材呢？）你哋話好咪好囉！」提到JC到寓所過夜，他即時扮聽不懂廣東話並說：「自己都經常去朋友屋企過夜。（第一次獨處過夜？）唔知點講，前日好似係第一次，都唔係成日。」
談到JC之前有美國男友Mr. Bond，安志杰強調冇搞三角戀：「係佢哋Broke up（分手）我哋先Start（開始），我唔鍾意麻煩，一知佢哋分手就即刻追。」他又自爆主動追求JC的過程：「都係食飯睇戲，美國人好Easy！（你追得好快手？）Yeah，我唔鍾意浪費時間。」問到JC是否易追？他即改口風維護女友：「Sorry，佢係好難追！」他續說聖誕未必帶JC返美國見家長，因工作繁忙。他又表示已有一段時間沒有聯絡舊愛謝婷婷，對方亦沒有致電恭喜他有新戀情：「好耐冇同佢聯絡，之前都有約佢見貓。（JC知貓貓係同舊愛養？）佢知，佢都好鍾意小動物。（見婷婷有拖拍你又拍拖？）唔係，其實我都鍾意單身生活。」
8月與前男友分手
據知，JC的確是與Mr. Bond分手後才與安志杰拍拖，而她最後一次見前度是今年8月，當時JC返美國探親，並順道跟對方會面，不過於本月初JC返美和姨甥慶祝生日時，已沒有再見對方。JC經理人被問到二人何時分手時，她說：「JC冇刻意講，唔想傷害前度，但我知佢哋係分咗手。而JC之前返美國冇見前度，因為前度同姨甥住嘅地方相隔好遠。」
