前無綫金牌監製劉家豪與梅小青的律師兒子昨日成家立室，榮升奶奶的小青姐激讚滿分新抱，而妹妹梅小惠則狂讚新郎靚仔似謝霆鋒：「可能『外甥多似姨』！」

劉家豪與梅小青娶新抱，關菊英攜同性密友周偉利飲番杯！

夏雨與米雪到賀，祝小青姐快啲抱孫！

江欣燕（右）扮靚靚去飲，與梅小惠玩番晚。

著名監製劉家豪與梅小青的律師獨子劉鎮然（Alfred）昨日與圈外女友胡佩儀（May）舉行婚禮，晚上筵開15席。一對新人在親友見證下簽字成婚，並三度咀嘴，咀足11秒！出席圈中人包括米雪、夏雨、江欣燕、關菊英與同性密友周偉利、被梅小青視為恩師的麥當雄與麥當傑、監製王心慰及潘嘉德等。

家豪哥及小青姐前年離開効力多年的無綫，過檔now後監製的《衛子夫》在內地創下收視佳績，昨日又榮升老爺奶奶，難掩喜悅之情，被米雪笑指「笑到合唔埋個口」！小青姐相當感動，連講三句「好開心」兼大讚新抱：「又靚又乖，十分滿分！」並表示不心急抱孫。梅小青妹妹梅小惠擔任婚禮司儀，自言有份湊大Alfred：「我有幫佢排隊報小學名校，當時仲傳係我私生子！其實唔明點解姐夫生到個仔咁似謝霆鋒，可能『外甥多似姨』啦！我都扮過王菲o架！」

被踢爆恨抱孫

至於夏雨、米雪與菊姐齊齊祝小青姐及家豪哥盡快抱孫，夏雨更踢爆小青姐「恨抱孫抱到不得了！」菊姐則說：「我帶咗利是嚟，我係長輩嘛！祝一對新人百年好合，小青姐快啲抱孫。（你同性密人好怕醜喎！）佢唔係呢行，見你哋影相，就自己行埋一邊。」米雪自言睇着Alfred成長，希望他早日生BB。