蔚雨芯怪癖 攰先係享受

現年21歲、人稱「魔鬼胸」的蔚雨芯（Rainky）於2012年以歌手身份出道，入行短短兩年已拍過電影、出過唱片和寫真，年紀輕輕卻很有事業心！早前她與前輩錢小豪、元秋、洪天明等參演無綫新劇《潮拜武當》，同時又參與周星馳執導新片《美人魚》的選角大賽，跟「寸嘴Barbie」夏尉喻、松岡李那和許雅婷等赴內地特訓。Rainky更自言是工作狂：「我個人好奇怪，冇嘢畀我做反而覺得仲大壓力，有嘢做我會覺得好充實，好享受嗰種攰嘅感覺，如果放假我會好頹！」

點名挑機張栢芝

雖然最終落選，但Rainky的演戲夢未被打沉，反而樂觀地表示學識游水，又識到一班內地朋友，並獲有份「揀蟀」的導演錢國偉邀拍戲：「我冇耿耿於懷，雖然Miss咗好多堂（特訓），但學到好多嘢，好似排舞演戲。（落選飲恨？）可能有某啲原因落選，但自問盡晒努力做好個騷，我覺得自己好叻o架喇，因為我有自信！但頒獎唔到我決定，希望將來有機會合作！」熱愛演戲的她盼與星爺合作，最想翻拍《喜劇之王》挑戰張栢芝的角色：「同星爺合作做咩都得，佢係我哋嘅偶像，頒完獎佢仲主動同我握手，話辛苦晒！我細個睇佢太多電影，真人同電影中嘅佢當然係兩個人，大家都鍾意電影中嘅佢，但真實嘅佢都好Nice，真係好想同佢切磋學嘢！」

性感收放自如

年年後生靚女輩出，要從中突圍，Rainky深明遊戲規則，所以經常「開心Share」32D驕人身材，但她盼有日能擺脫性感形象：「初出道我並唔性感，但觀眾想我性感，已經深入民心，我都做過好多嘢唔性感，只係大家Focus喺度，多謝媽咪畀呢個Body我，我會喺適當時候益吓大家，但適當時候又會收埋，因為我唔想Over咗。」提到在擔正電影《微交少女》中，當時年僅19歲的她請替身代拍露點戲，問到日後會否接拍露點戲？她說：「我覺得唔會，因為我好尊重家人，一定屋企行先，但都尊重導演決定，我就覺得唔需要自己做。（拍大導演李安嘅戲就願意露點？）有嗰日先算啦！我好睇劇本、演員、角色，睇有冇呢個需要同膽量挑戰，暫時我幻想唔到。」她又自言比較悲情、易喊，反而適宜拍慘情戲。

同楊怡做「鬼婆」

談到處女劇《潮拜武當》，作為新手的她坦言很大壓力，慶幸遇到一班好演員，令她很快投入角色：「因為裏面我最新，佢哋都當我小妹妹，好照顧我，有時排戲唔記得台詞都會尷尬，因為我唔習慣個環境，但好多時佢哋都會提我，最開心係同楊怡講鬼古，成個工作過程好開心！」Rainky又稱獲洪天明教路：「第一次拍劇好多嘢都唔識，好似望機位、燈光，好彩第一場同天明拍，佢教我最多嘢，有佢喺度我冇咁騰雞，拍咗半個月都開始適應，所有嘢好順利，大家都好Crazy，好搞笑！」片中她飾演18歲的爽朗活潑學生妹，笑言最深刻與「哎吔老竇」錢小豪「愛的抱抱」：「雖然角色唔係好Cute，但有時都好嗲、好細路女，有幕要攬住小豪哥叫爹哋，呢下真係毛管戙，依家大個咗就算愛爹哋，現實中都只係拖手同摸頭。」

做到隻積好開心

身為90後的Rainky，對事業非常有衝勁，日日不停地工作，早前同時接拍《潮》劇及參選《美》片，據知她每日中港兩地走，朝早到內地特訓，接着返港拍劇，猶如牛一般勤力。受訪當日，Rainky臨時接到劇組通告要開工，但她未有怨言，早上照舊回公司開會，然後接受本報訪問，緊接再撲返將軍澳開戲，行程緊湊依然面不改容好好笑口，認真後生可畏，相信她的努力假以時日必有回報！