陳慧琳（Kelly）三年前與古天樂合作賀歲片《八星抱喜》後，近日獲富豪酒店集團之邀再合作微電影。Kelly說：「都有啲親熱場面，好似就嚟錫又錫唔到咁囉！」Kelly昨日被發現右手粉臂遍布紅印，她解釋：「生蛇呀，醫生話我細個時出過水痘，留咗啲菌喺身體裏面，依家發出嚟，就嚟好番嘞，最嚴重嗰時我成日覺得好似觸電咁，沖涼啲水彈埋嚟好痛。（驚傳染兩個囝囝？）大仔打晒預防針，細仔仲欠一支，應該冇事。（留疤？）驚會呀，好彩傷口好細！」古仔聞訊後作勢彈開，隨後又「醫生上身」與Kelly討論病情：「我未出過水痘，因為成日走埠關係，我有個藥箱載有各類藥物傍身就真。」談到再合作，Kelly說：「上次同古仔拍戲就生仔，今次生蛇……」古仔說：「你夠嘞，就嚟開酒樓嘞，咁鍾意賣點心（指蝦餃仔及小龍包）。」Kelly說：「咁又係，一盅兩件夠晒數。」

Kelly因生蛇令右手粉臂遍布紅印，我見猶憐。

古仔聞Kelly生蛇即作勢彈開，十分搞笑。