所謂大樹好遮蔭，未有外闖經驗的合約藝人想作個人試煉而跳出大海，不過，無綫出身的馬德鐘，卻有「都是娘家好」的念頭而吃回頭草，最近他因拍新劇而嘗足戲癮，因而再與無綫傾新合約，希望重回大台賺取人氣來鞏固形象。

與徐子珊等夾錢請客的馬德鐘，返回無綫後甚有歸屬感。

徐子珊十分多謝黃光亮，拍攝期間氹得大家很開心。

李思捷（後排左起）、馬德鐘、徐子珊及江美儀等，開心得笑不攏嘴。

馬德鐘、徐子珊、江美儀、李思捷和黃光亮等，前晚在酒樓夾份為無綫新劇《以和為貴》擺煞科宴，宴請台前幕後食飯兼慶祝順利拍完，不過馬德鐘到場前卻大懵遺失提款卡，搞到報失之餘，惟有逼住碌卡埋單再收回現金。

花費不打緊，皆因馬德鐘準備回歸娘家，所以請客感覺特別有歸屬感，他透露跟無綫合約已完，現正洽商其後的簽約條件，他笑說：「錢緊要！（劇種有冇要求？）其實都唔緊要，好似今次《以和為貴》個角色都好好呀，都期待套劇出街。（幾時播？）月曆就影咗5月。」

江美儀大讚李思捷

早前因傳與高層樂易玲不和而離開無綫轉攻內地的馬德鐘，始終感到娘家好，所以寄望返無綫拍劇：「返到去做嘢呢，好多時都係得我一個香港人，返無綫，即係好似今次咁，個個都識，好有親切感，好開心。」而樂易玲昨日受訪時坦言正與馬德鐘接觸。

此外，同劇的江美儀和李思捷於飯局中表示這次合作很開心，思捷更在旁打趣用「A+」來形容開心情形，而美儀更大讚他Sweet：「我終於明白點解佢有咁多個女朋友，佢成日都氹到我好開心。（佢好多女朋友？）女性朋友啫！」

徐子珊感激黃光亮

另外，今次有份請客的子珊大呻劇集拍完感到依依不捨：「今次係我拍得最開心嘅一次，一開始係攰少少，不過要多謝亮哥（黃光亮），成日都令到我哋好開心。（因為是非少？）我哋相處好融洽呀，大家成日諗計令到對方發揮得好啲，又會傾吓個情節點先會討好。」今年聖誕她將到台灣探望家人，還自爆全家也搬到台灣，問過節會否寂寞？子珊笑說：「咁台灣好近啫！（最近傳星二代喺台灣夜店被迷姦喎？）自己少去夜店，唔太擔心。」