歌后Ariana撼八變Nicki鬥吊鬥Sexy
《2014 MTV歐洲音樂錄影帶頒獎禮》前晚圓滿結束，因大部分得獎紅星玩失蹤，結果由主持Nicki Minaj化身「八」變天后凸圍而出，而奪兩獎的Ariana亦性感示人，雙雙成為全晚亮點。
Ariana以例牌性感造型上陣，相比Nicki的八變造型色略為失色。（Getty Images圖片）
Nicki（Getty Images圖片）
孔雀裝（美聯社圖片）
椰殼頭（Getty Images圖片）
Ariana行紅地氈時大受歡迎，影到手軟。（Getty Images圖片）
奪兩獎封歌后的Ariana，開心得高舉獎座。（Getty Images圖片）
Ariana坐吊椅演出，細膽啲都唔得！（美聯社圖片）
女歌手Kiesza以吊帶裝上陣落力獻唱，甚為火辣。（美聯社圖片）
U2主音Bono戴黑超獻唱型到爆！（美聯社圖片）
年度盛事《2014 MTV歐洲音樂錄影帶頒獎禮（EMA）》前晚在英國格拉斯哥舉行，由於大部分得獎巨星未有現身支持，令百變主持Nicki Minaj狂拋事業線成功搶盡「峰」頭，而女歌手Ariana Grande亦趁機上位！
人氣五人男子組合One Direction（1D）於頒獎禮中獲得三大獎，包括最佳流行歌手、最佳現場演唱及最受歡迎歌手獎，但1D五子未有畀面撐場領獎，反而上選秀節目《X Factor》擔任表演嘉賓，但他們仍識做地拍片感謝粉絲，成員Harry Styles說：「我哋好遺憾今晚唔能夠同你哋一齊，好多謝你哋畀我哋嘅最受歡迎歌手獎。」
開場白爆粗 為失言道歉
當晚所頒的第一個獎項「最佳歌曲獎」，由美國女歌手Ariana Grande的《Problem》奪得，並從大肚創作女歌手Alicia Keys手中領獎。Ariana穿起迷你熱褲及長靴騷長腿，雖然火辣但毫無新意！演出時，坐在椅子的Ariana被吊上半空，難得仍然全無懼色，發揮超水準，而她亦同時獲得最佳女歌手獎。
至於主持兼最佳Hip Hop歌手得獎者Nicki Minaj，當晚一口氣換上八套服飾，以「八」變形象挑戰捧蛋的百變天后Lady GaGa！Nicki出場時從半空吊下來，穿上14呎長裙兼騷胸，還爆粗作開場白：「格拉斯哥有啲乜X嘢好？依家係11月同EMA頒獎禮，坐穩，放鬆，準備反X轉個場！」事後為失言而道歉。
Justin寧願「查經」唔領獎
此外，天后Katy Perry、Beyonce與麻煩小天王Justin Bieber同樣有份獲獎，但統統缺席潛晒水，Justin寧願「查經」唔領獎，令今年的頒獎禮失色不少！
