女星李彩華今日31歲牛一，她豪擲30萬元宴請父母豪遊杜拜慶祝，生於11月11日光棍節的她豪請、豪玩、豪食、豪飲、豪住……卻獨欠一個男朋友！她發表告別光棍生日宣言：「大家落力啲介紹男仔我識啦，成功咗一定醒封大利是！」　

難得到帆船酒店朝聖的李彩華留下情深一吻！（設計對白）

童心未泯的李彩華於沙漠跳跳紮，跳得咁高真係好「強」喎！

於內地狂搵人仔的李彩華代言內衣騷身材。

單身的李彩華希望早日遇到真命天子，實現「女人畢生的大志」。

孝順的李彩華請父母豪遊杜拜。

今日31歲生日的李彩華（Rain）有感近年忙於內地工作，甚少陪伴雙親，故有小富婆美譽的她豪擲30萬元請父母遊杜拜慶生日，除租了兩間每晚房租20,000港元的帆船酒店房間外，又坐商務機位讓父母舒舒服服遊杜拜。

向大富翁進發

雖然全程豪請、豪玩、豪食、豪飲兼豪住，使費超級「乸脷」，但貴為新一代小富婆的Rain毫不肉赤，今時今日乜都有，芳華正茂的她偏偏欠一個男朋友，令她內心赤赤痛，更揚言「好想告別光棍」：「今年生日有好大感受！以前同人拍拖，因為自己經濟麻麻，怕會做咗人哋嘅負累，到我依家經濟好，啲男仔又唔敢埋身。我好日都唔喺香港，好多朋友趁我一返香港就猛介紹男仔我識，次次都安排飯局，但我都係遇唔啱，唉！做女仔真係好難，大家落力啲介紹男仔我識啦，成功咗一定醒封大利是！（小富婆銀彈覓好姻緣？）又唔係咁講，我向大富翁進發，其實兩個人喺埋一齊最重要內心滿足同價值觀相近。」

挑戰「宇宙最強」

名利雙收的Rain亦有新的演藝大計：「我代言嘅品牌因為產品暢銷，我入選咗三十大網上代言人，同甄子丹齊名，嗰三十個廣告稍後仲會喺紐約播，我希望趁呢個機會衝出亞洲、邁向國際，做『女版宇宙最強』！」