2007年亞姐冠軍張家瑩効力亞視7年，底薪僅萬餘元的她仍能以富家女姿態追尋演藝夢，全因背後有個億萬身家的父親照顧，有米老竇更經常塞錢供女兒「責袋」，每次均數十萬元，出手闊綽，難怪家瑩豪氣地說：「豪得起！」　

貴為億萬富家女的張家瑩，不怕低薪努力追尋演藝夢。

張家瑩獲有米老竇派幾十萬「零用錢」，完全唔怕冇錢使！

億萬富家女張家瑩自爆於亞視３年冇人工加，入不敷支仍甘願留守財困的亞視，全因經營舊樓翻新工程的父親在背後「撐腰」！雖然張家瑩曾被力勸打理家族生意，惟貴為2007年亞姐冠軍的她最終卻選擇留守亞視默默耕耘，至近月才升呢做「一姐」！

開餐廳豪得起

據知家瑩的底薪只有逾萬元，有車有樓的她最近更與父親合資千萬元在銅鑼灣開設兩間餐廳，似乎並非口中所指的「中產」咁簡單！其實家瑩之所以能無後顧之憂地追尋演藝夢，全因有個家底豐厚的父親！家瑩透露父親因擔心她不夠錢使不時伸出援手：「每年總會有三、五次，每次塞三幾十萬畀我，真係好幸運，有屋企人支持，又做到想做嘅嘢！依家住層樓都係爸爸買畀我，最近亦同爸爸合資餐廳，就算有自己生意我都會繼續拍嘢，我豪得起！仲後生呀嘛！」

人工低過廚師

現時底薪逾萬的她自嘲其餐廳的廚師人工亦比她高：「佢哋分分鐘有兩、三萬蚊！（餐廳有錢賺會加人工？）會！幫公司賺到錢應該畀呢啲福利佢哋！大家先可以共同進退。」

談到被爆身家豐厚，現時單身的她可要求另一半門當戶對？她笑說：「唔會，呢個年代男仔識得揀！我都試過鍾意人，但對方唔鍾意我，最重要係心地善良！（想幾時結婚？）早幾年已經話想結，或者35歲前，到時閃婚都唔定！生仔到我遇到啱嘅對象即刻生，因為愈快生就愈快收到身！」