官恩娜訂婚 明年嫁醫生
早前因面癱停工的官恩娜（Ella）昨日凌晨自爆與混血醫生男友Domingo訂婚，並大晒在巴黎影的甜蜜婚照！昨日戴上巨型鑽戒出席活動的Ella開心Share待嫁喜悅，笑言緊張到「標汗」的她更揚言不會做未婚媽媽！
官恩娜出席活動時風騷大晒手上巨型求婚鑽戒，確係又大又閃！
現年35歲的歌手官恩娜（Ella）雖然早前患上「貝爾氏綜合症」而導致面癱，但拍拖近六年的外籍醫生男友Juan-Domingo Maurellet仍舊不離不棄，令Ella大受感動，並笑言男友「唔係鍾意我個樣」！得到男友「貼身」照顧的Ella病情隨即好轉，並於上月宣布全面復工，昨日凌晨三時許，她更在微博自爆與Domingo訂婚，認真雙喜臨門：「現在的心情真的很興奮！我要向大家宣布！我們訂婚了！」並大晒在巴黎影的靚相，衣着簡約的二人在陽光下相擁兼情深對望，認真Sweet到爆！
冇車冇樓都肯嫁
剛宣布婚訊的Ella昨日閃爆現身時裝品牌UNIQLO活動，並大晒左手的巨型求婚鑽戒，但未有透露戒指卡數，只笑說：「唔好咁現實，搵到一個好啱自己嘅人係好難！」獲大批歌迷及好友送上祝福的她又表示這一刻是35年來最幸福，提到求婚過程時更冧爆表示超級驚喜，惟她不願透露訂婚日期，只肯承認男友有下跪求婚：「喺香港求婚，但我係冇估過佢會求婚！（男友冇車冇樓都肯嫁？）冇諗呢啲！活咗35年從未覺得咁開心，第一次感覺到有個人想你做佢老婆，原來咁Sweet！佢都有跪低，我以為係玩，因為佢成日都情深款款玩嘅，直至我見到隻戒指先知係真！」
多啲一齊住唔驚有B
自言緊張到「標晒汗」的Ella透露一早計劃好在巴黎影相，更笑言為上載靚相搞到「瞓唔着」！她又澄清並非刻意瞞婚：「其實一早訂咗，唔舒服前已經訂咗，只係我想處理好啲Pre-wedding相先公布。（幾時完婚？）今年一定唔會，應該出年。婚禮都未必會大搞，因為我一向都好驚大龍鳳，最緊要係兩家人齊齊整整一齊。」雖然已經訂婚，但暫不會同居，她說：「我唔鍾意同居，不過之後可以叫佢嚟多啲住。」自言有計劃的她更表示不會有「意外」，誓不做未婚媽媽！
