歌手吳雨霏（Kary）戀情兜兜轉轉，最近與「網球王子」洪立熙復合，不但在活動上大晒甜蜜讚男友攞滿分，還預告隨時嫁人，把口雖然話唔急，但男友落足誠意求婚就一定事成！

Kary暗示得咁明顯，男友幾時先識做？

盛裝出席活動的黃芷晴鼓勵黃美棋「唔使咁自閉」。

吳雨霏、王敏德女兒王曼喜、黃日華女兒黃芷晴和汪圓圓表妹湛琪清，昨日出席時裝品牌Coach開幕活動。其中Kary擔任剪綵嘉賓，談及揀手袋心得，她表示喜愛實用型，容量大為主。記者笑問揀男友是否要大隻型？她說：「最好全面啲，（專一係必要條件？）梗係，最好放我喺第一位。」她最近與「網球王子」洪立熙復合，問到對方是否滿分，她甜絲絲說：「都OK，（就快結婚？）又問？順其自然啦。（求婚必嫁？）都準備好，我鍾意對方求婚，有驚喜，唔使大龍鳳，最緊要有誠意。（同好友鄧麗欣傾吓？）係都傾佢先啦，佢更加需要驚喜！」

王曼喜否認同居

另外，王曼喜早前被拍得與外籍同性密友Lia行傢俬店，問到是否展開同居生活？她說：「佢搬屋我陪佢買，（喺對方度過夜？）都有，一齊咗段時間。」至於會否與Lia同居？她說：「遲啲，想自己負責到先。（家人唔抗拒？）佢哋思想開通。」問到平日會否稱Lia為「BB」或「Honey」，她笑說：「我唔會咁肉麻，叫英文名。（有冇諗住同對方喺邊度結婚？）一定同佢結o架咩？」

而黃芷晴對於有報道指同公司的黃美棋人前人後兩個樣，更與前經理人反面，她坦言感到驚訝：「印象中成隊Team佢同經理人係最好朋友，有時做完嘢都會車佢返屋企。（二人反目？）人哋嘅事冇過問，費事講錯嘢。」對於美棋自言在圈中沒有朋友，芷晴說：「唔使講到冇朋友，出席活動係會少時間相聚，唔使講到咁自閉。」