Victoria's Secret（VS）前日爆出今年請來兩大VS天使Adriana Lima和Alessandra Ambrosio戴「Fantasy Bra」行年度內衣騷，首度打孖上，兩女落力宣傳逾1,560萬港元的鑽Bra，但難為因推出「完美內衣系列」而被鬧爆的VS補鑊！　

內衣名牌Victoria's Secret自2001年起，每年都會請一位VS模戴上價值不菲的Fantasy Bra行年度內衣騷，不過前日爆出今年破天荒請來兩位VS天使Adriana與Alessandra齊齊戴着「Dream Angels Fantasy Bras」上陣，於下月2日現身首度於倫敦舉行的內衣騷。

兩女前日孖住上節目《Good Morning America》宣傳，透露鑽Bra套裝配上多款鑽飾，由珠寶商Pascal Mouawad用上16,000粒寶石、鑽石、藍寶石以及18K金打造，分別有紅藍兩色，各值逾1,560萬港元，而且工序耗時1,380小時，認真大陣仗，難怪兩女都讚不絕口！

「享受」被妒忌

今次已是第3次戴鑽Bra行騷的Adriana說：「Fantasy Bra係每年內衣騷嘅重頭戲，個個模特兒都妒忌，想知道邊個會戴鑽Bra，我真係好興奮今年可以行孖咇，感覺好榮幸！」

而第2次戴鑽Bra上陣的Alessandra指今年的內衣騷一定最多人睇，認真識講嘢！同樣現年33歲的她們均出身巴西，而且於VS年資深，難怪不少粉絲留言支持！

2萬人白宮告狀

雖然孖咇鑽Bra噱頭十足，但VS近日因推出「Perfect Body」內衣系列而被指鼓吹高與苗條等於完美，被鬧爆歧視肥人，形象插水，日前時裝零售商JD Williams推出「PerfectlyImperfect」活動反擊，找來身形年齡不同的女士拍內衣廣告，另有英國學生於網上發起活動，向美國白宮要求VS將廣告改正及停用同樣的宣傳方法，現已有2萬人聯署。另外，上周末於紐約內衣時裝周有「反VS」內衣騷，以不同身形及界別的女性包括乳癌康復者上陣，帶出性感內衣適合所有女性的觀念，而VS對批評未有回應。