名模Cara G. 昨日首度帶同八個月大的女兒India出席活動，India完全不怕面對鏡頭，更將大會送贈的鞋子放入口，搶走名模媽咪的風頭！

捉實愛女India行路的Cara淺露事業線，成功搶回「峰」頭！

India見鞋就咬，令在場人士忍不住大笑。

愛錫India的Cara暫不希望囡囡拍廣告。

今年誕下女兒的名模Cara G.，昨日帶同八個月大的女兒India現身童鞋專門店開幕，年紀輕輕的India面對鏡頭及傳媒時不單止未有怯場，更做出多個表情，時而皺眉時而微笑，更腳仔亂踢，非常活潑。當大會送鞋給India時，她竟然將鞋子放入口咬，令現場人士忍俊不禁，即時成為全場焦點！

咬腳趾最經典

Cara笑言女兒喜歡咬東西，見到甚麼都會咬，最近更愛咬人﹕「有日我放佢喺地，我坐喺度睇電視，佢咬我腳趾，佢真係好瘋狂！」並大讚女兒第一次出席活動表現很好：「我之前有啲緊張，因為平時呢個時候佢係瞓緊晏覺，佢今日都表現得好好，好開心同佢一齊出活動，但我對眼唔可以離開佢！」提到India完全不怕面對鏡頭，她說：「我諗係，因為老公好鍾意幫佢影相。（有潛質做模特兒？）可能，但老公應該唔想，我就想囡囡做醫生，不過做乜都冇所謂，隨佢鍾意。」

母女檔冇加價

她透露有廣告商找India拍廣告：「有！但我推咗，我唔想囡囡單獨做嘢，如果同我一齊又唔同。之前都有帶佢一齊做訪問，但佢仲細，唔想佢長時間喺拍攝現場！」不介意帶India出席嬰兒品牌活動的Cara否認母女檔酬勞增加：「冇分別！哈，都應該要有分別喎！」