陳國邦日前為主題樂園擔任舞台劇主角，飾演「鐵漢」冒險家，更獲太太羅敏莊及愛女驚喜到場探班，即時流露慈父「柔情」！在劇中不乏搏鬥場面的他，又指囡囡盡得其好動本色，最愛示範「危險」動作！

國邦完騷後與老婆囡囡睇巡遊，開心到齊齊舉V。

國邦在舞台劇中扮演被詛咒的探險家。

國邦一家在樂園餐廳歎美食，你睇囡囡幾趣致！

囡囡與米奇「一見鍾情」，捉實要錫錫。

陳國邦日前獲邀為迪士尼樂園演出限定舞台劇，劇中扮演勇猛冒險家的他，要應付大量搏鬥動作，故完場時往往喘氣連連：「好驚喜佢哋搵我，我喺劇入面係被詛咒的探險家，成日要同魔法打交，其實就係要同空氣搏鬥……我次次完場都冇咗三分之一條命，喘晒氣！」

玩具山咁高

國邦表演如此落力，太太羅敏莊於是帶萌爆囡囡陳禛驚喜探班，完騷後更暢遊樂園！他們大歎美食，又欣賞夜間巡游「迪士尼光影匯」！談到囡囡快兩歲生日，國邦指乖女已日日有禮收：「身邊朋友多數未有小朋友，加埋屋企人，個個都買禮物畀佢，真係受盡萬千寵愛，搬屋時玩具都三大箱！不過佢好乖，從來唔扭計買玩具。（點慶祝囡囡生日？）到時再入嚟捧我場同食飯！」

童星有樣睇

國邦談到囡囡即滔滔不絕，又指她性格好動大膽：「佢好鍾意做危險動作，例如佢企喺枱上面，如果知我哋會接住佢，佢真係夠膽跳落嚟！」囡囡表情多多，問到可有潛質成為童星？敏莊即搶白稱囡囡表演欲強：「未知呀！但佢咁細個已經鍾意唱歌同跳舞，佢睇卡通片仲識扮聲！」