官恩娜與周秀娜被吳鎮宇「迷倒」，合作拍戲時爭相「集郵」，而另一拍檔鄭中基（Ronald）談及即將再為人父，心情大佳之餘更表示未有計劃「封肚」。

Ella的「黃牙婆」裝扮似模似樣，十足真村姑！

客串一日的娜姐自爆想成功「集郵」！

一眾演員齊齊出席開鏡儀式，認真熱鬧！

Ronald特別為電影曬黑，「鄉」味十足！

官恩娜（Ella）、娜姐、鎮宇及Ronald等昨日在西貢出席寰宇新片《惡人谷》開鏡，場面熱鬧。戲中扮演村長的Ronald特意曬黑皮膚兼以「懷舊高腰褲Look」亮相，Ella則每天花上兩小時「扮醜」，搽黃牙齒兼滿口圍頭話唸對白，為藝術犧牲。

Ella與娜姐受訪時，異口同聲對鎮宇「傾慕」不已！Ella大讚男神：「我有同佢打招呼，佢回咗我好多句Hello，好Nice呀！不過未有機會傾偈囉。」客串一日的娜姐更不問片酬，只望能成功「集郵」：「我仲諗住嚟做『坤嫂』…總之一大班人合作好開心，當學嘢啫。」

Ronald買DV陪老婆生仔

而Ronald則透露太太預產期是明年2月，他笑言已買定攝錄鏡頭陪太太入產房：「大女出生時因為航班延誤，未能陪太太入產房，今次點都會留喺香港，仲諗住影低情形，希望佢（BB）趕得切出嚟(才豆)利是啦！（改咗名未？）中文名留番爺爺同公公幫手，我就負責英文名。（封肚？）冇諗喎，一切隨緣啦。」