一向愛浮誇的美國真人騷女星Kim Kardashian繼早前與男歌手Kanye West大搞奢華婚禮後，日前舉家飛到拉斯維加斯慶祝34歲生日，更穿Deep V到肚臍的白色晚裝晒巨胸而成焦點！

Kim日前與家人坐私人飛機到拉斯維加斯開P慶祝34歲生日，與Bruce Jenner離婚的Kim媽Kris Jenner亦不愁寂寞，帶同巡唱搞手新歡Corey Gamble與家人齊齊飛，連影大合照都有份，似乎相當入屋！

收四層蛋糕冧笑

愛做風頭躉的Kim甫到埗即換上白色Deep V晚裝，真空上陣晒盡左右半球及玉背，相當養眼！Kim妹Khloe則以金牙套低調搶鏡。心情High爆的Kim滿場飛與好友及姊妹合照，一時側身一時舉V，幾度瀕臨走光邊緣，幸其歌手老公Kanye West相當大方，不但不怕老婆被睇蝕，更（目及）埋一份，場面搞笑！有「黑面神」之稱的Kanye全場笑唔停，日前留言為老婆祝壽時更寫下愛的宣言：「生日快樂呀BB！有時我覺得淨係講我愛你都唔能夠表達我有幾愛你！」認真Sweet！

大會又為壽星女準備四層高的蛋糕，上面寫有「Mrs.West」字樣，難怪Kim一見即冧笑，派對上卻未見二人愛女露芙（North）！

另外，有指Kris於場內與Corey打得火熱，未知是否以新歡治療前夫Bruce搭上好友Ronda Kamihira的傷痛？二人同晚齊齊飛返洛杉磯。另一方面，Khloe近日上載為真人騷拍攝的宣傳照，大晒長腿。