早前被《好報》獨家踢爆與無綫男神馬國明拍拖的寰宇小花徐佳琦，近日趁馬明北上拍攝新劇《梟雄》，火速有四眼Cap帽男陪睇戲、陪食飯兼陪飲糖水！

佳琦翹埋雙手，刻意同Cap帽男保持距離。

佳琦掛住篤電話，毫不理會Cap帽男。

佳琦隨Cap帽男到糖水舖食糖水。

日前下午5時許，徐佳琦於住所附近的商場內會合一名身材高大的四眼Cap帽男，對方甫見她即展示冧爆笑容，雖然有異性相伴，但心繫馬明的佳琦明顯冇乜表情，只見她雙手翹在胸前，刻意與對方保持距離，更不時低頭篤手機。兩人睇完戲後再前往日本餐廳撐枱腳，只見Cap帽男雞啄唔斷不時出招氹女神，醫肚後還死（舌累）轉場食糖水，食完又載女神過海，前後獨對數小時，擺明向馬明下戰書拗手瓜！