無綫劇集《使徒行者》收視報捷，無綫行政主席梁乃鵬昨晚宴請台前幕後，佘詩曼及林峯談及戀事即時甜絲絲！問到是否翻撻鄭嘉穎，阿佘全程冧笑指正等待愛情，成事卻要「問個天」！林峯則準備出冧招為女友千語BB驚喜慶生！

阿佘承認在曹永廉生日會上與嘉穎有偈傾，會靜待愛情來臨。

林峯為女友千語BB的生日大玩DIY驚喜，有愛情滋潤全程笑到四萬咁口！

封胸上陣的高海寧露長腿搶風頭。

陳敏之及梁乃鵬祝賀《使徒行者》收視報捷。

早前熱爆全城的無綫劇集《使徒行者》錄得平均收視30.5點的佳績，昨晚無綫行政主席梁乃鵬在將軍澳電視城宴請台前幕後慶祝收視報捷，主要演員佘詩曼、林峯、陳敏之、沈震軒及黃長興均有出席。

等桃花運到

早前阿佘被本報拍得與舊愛鄭嘉穎出席曹永廉生日會，問到是否復合？她笑言是美麗的誤會：「去到先知有另一個Party，但大家分房玩。」提及與嘉穎有否傾偈？她則甜笑地點頭並謂：「打邊爐咋！好熱鬧囉！（復合？）都一段時間冇聯絡，嗰晚醉醉哋，乜都唔記得，總之大家好開心！（短訊聯絡？）冇！（想佢有？）等緊自己嘅愛情，要問個天！（佢追番你？）隨緣啦，我都想有個令自己開心嘅另一半。（多人追？）唔係！」說畢即扯開話題指將拍攝電影《十月初五的月光》，並謙稱尚未入圍爭視后，但難掩冧爆表情！

有傳以一億天價加盟英皇的林峯直認已簽約，但價錢是商業秘密。問到是否簽約三年？他說：「新聞係咁講，咪係咁囉！」

生日送驚喜

問到女友吳千語本月27日生日是否已在籌備？林峯指是秘密，卻笑到四萬咁口地表示已籌備數月：「會送手工藝嘢，叫佢唔好估，佢次次都估中，搞到我冇咗Surprise！」梁乃鵬大讚《使》劇創新。提到觀眾收看電視模式有變，會否降低請食飯要求至24、25點？他指最好是28點：「都要有啲難度去挑戰！」對於港視即將開台，他坦言毫不擔心：「佢嗰個係購物平台，唔係一個頻道，媒體都稱唔上，大家唔同業務。（會播劇？）係倉底貨，總有一日會播晒。」