無綫小花張秀文（Sammi）憑甜美笑容及苗條身材勇奪2010年港姐亞軍，她早前獲委派擔任世界盃大使，成為首批飛到巴西宣傳的先頭部隊！問到球技如何？常食波餅的她自封「黑仔王」：「冇人肯同我踢波，因為我成日踢空球同食波餅，搞到我心靈受損！而且凡係球類都好似識追住我嚟打咁，就連打羽毛球同乒乓波都會中頭獎！」

身形弗爆的港姐亞軍Sammi，原來為水腫問題下了不少苦功！

自稱「飯桶」的Sammi最緊要有米落肚，早餐尤愛吃十穀米。

問到會否做運動瘦身？自稱「飯桶」的Sammi竟指靠食飯減肥：「我最鍾意食十穀米做早餐，有時仲會食朱古力蛋糕同薯片。（唔怕肥？）早餐食肥膩啲都冇所謂，下晝已經會消化晒！但晚餐就唔可以大魚大肉，約五成飽就要收口，仲要戒食澱粉質！」Sammi又自爆深受水腫問題困擾：「水腫搞到我面圓圓，試過飲多咗水瞓覺，第朝起身塊面腫到似氣球！（飲咖啡同濃茶？）我飲咖啡會手震同心跳加速，濃茶會胃痛！惟有跳中國舞試吓去水腫，試過密集式咁跳三個月，成個人都Slim番晒！」