「宅男女神」黃美棋出名為食,閒時愛試煮中、西菜式及日式甜品挑戰廚藝,並會呼朋喚伴到場「試餐」。今次她首度炮製杧果黑糖挫冰,切材料、刨冰塊及加裝飾等均一Take過!於網誌寫地道食評的美棋BB更有意出書,為收入較低的年輕一輩搜尋廉價美食!

美棋BB有意出書交流烹飪心得,似乎她深明「獨食難肥」之理!

美棋BB將最愛的愛民杧果切到細細粒備用。

少有動手製挫冰的美棋BB,淡淡定將巨型四方冰塊放進大型挫冰機。

愈玩愈High的美棋BB,眨眼間把冰塊刨成口感細滑的挫冰。

自稱甜品達人的美棋BB,均勻地把黑糖糖漿淋在純白挫冰上。

貪靚的美棋BB不忘以杧果粒為挫冰扮靚。

美棋BB加上裝飾用的薄荷葉後,製作簡單又透心涼的杧果黑糖挫冰便大功告成!

年紀輕輕的美棋BB已入慣廚房,更常為好友炮製大餐。

舊作晒冷
曲奇

蛋糕

菠蘿包

花膠湯

近日天氣開始轉涼,但無阻美棋BB試製挫冰的決心,今次她以台灣直送的愛民杧果及黑糖糖漿,炮製一道透心涼的甜品!常為朋友充當大廚的美棋BB,無論切杧果、刨冰塊及裝飾製成品都一手包辦,有板有眼!身形的骰的她食極唔肥,更曾因「為食」稱霸校園:「我超級鍾意整嘢食,中學課外活動全部揀晒烹飪班,仲試過幾年攞咗家政科全級第一名!」好奇心爆棚的她又愛「試新嘢」:「成日上網搵食譜煮新嘢,但我煮嘢食嘅分量好隨心!(唔驚太重口味?)我本身食得好清淡,會慢慢調番個味!(不斷試菜唔驚肥?)我整完會叫朋友上嚟『清場』,只要佢哋肯洗碗就得o架喇!」

拿手芝士蛋糕

不斷試煮新菜的美棋BB曾因失手而鬧出笑話,屢敗屢戰的她說:「失咗手會冇咁好食,但未至於難食到放唔到入口,喺美國留學時每個禮拜都會試煮一樣新嘢。有次自製菠蘿包,但點都買唔到『臭粉』,令塊菠蘿皮超硬!仲試過煮花膠湯落得太多花膠,變咗『膠湯』!如果唔即刻飲,就要當啫喱咁食,口感奇奇怪怪!」

問到最擅長炮製甚麼美食?美棋BB表示對日式芝士蛋糕頗有研究:「我讀書時平均每隔兩至三日就會買材料整芝士蛋糕,因為要不斷比較食譜同加新嘢,例如加綠茶粉或朱古力粉變吓口味!」她透露每逢大時大節都會大展身手:「每次跨年節日我都會焗定曲奇,Pack好一包送畀朋友!(情人節點準備?)美國啲牛扒特別好食,所以情人節會為父母煮牛扒慶祝!(唔送朱古力畀心上人?)唔會呀!感覺好怪!(要等真命天子先送?)到時先算啦!」

鋪路出書「搵食」

問到試勻中、西菜式及日式甜品,會否推出烹飪書分享心得?美棋BB指正踏出第一步於網誌發功:「我不斷喺網誌寫地道小店嘅食評,希望為未出嚟做嘢同收入較低嘅朋友仔介紹平價美食,當儲夠材料之後,當然想出書啦!」

冒險煮義

對烹飪具冒險精神的美棋BB自爆愛「嘗鮮」整刺身,更試過誤製「石頭鮑」刺身:「我淨係知道要洗乾淨同幫鮑魚出水,我用牙刷狂刷佢幾分鐘,結果個刺身變咗石頭咁硬!原來唔可以刷佢咁耐,會令佢肌肉緊張『硬繃繃』!」