鄭嘉穎 佘詩曼借醉翻撻

鄭嘉穎和佘詩曼雖已分手多年，但一直有傳翻撻，兩人前晚前後腳出席曹永廉在長沙灣一間火鍋店舉行的生日派對。前晚7時許，鄭嘉穎穿黑皮褸、牛仔褲及戴黑框眼鏡亮相，在林子善陪同下乘的士到場，有指嘉穎是幕後搞手，他說：「唔係，主人家唔係我，嚟食餐飯啫！（你叫曹永廉大搞？）咁50歲係大壽，梗係要大搞，旺旺佢啦！有準備生日禮物，我比較實際。」語畢從袋中取出一封利是。未幾，素顏的佘詩曼獨自乘的士到場，甫見記者即大感愕然，她說：「嚟同朋友食餐飯啫。」然後禮貌地向記者揮手道別，急步入場。

孖公仔滿場飛

據悉，佘詩曼與鄭嘉穎在場內玩得相當投入，沒有半點避忌。隨着幾杯酒落肚，兩人愈傾愈埋，逐漸拉近距離！適逢生日會場地旁有晨曦足球隊成員舉行聚會，他們不時「兩邊走」兼四處碰杯，開心得滿場飛！據知兩人多年前分手後，從未出現一段穩定感情可開花結果，他們隨着再度相處後再現默契，加上身邊友人推波助瀾，望兩人重修舊好，令他們更新翻撻在望！有指嘉穎是今次生日會的幕後搞手，由他負責出面邀請賓客，前晚出席嘉賓還有黃智賢、洪天明、黃浩然、郭晉安及黃長興等，眾人更帶來約8支威士忌到場豪飲。

至於獲多名好友慶祝50歲生日的曹永廉，因保養得宜被記者揶揄「童顏」，問到生日願望是甚麼？他說：「都係身體健康，咪睇我咁（後生），其實身體機能都到50歲！」另外，獨自到場的天明略顯疲態，問到會否不醉無歸？他笑說：「希望唔會畀人打橫抬出嚟！」他又揚言要包起全場酒水，卻率先「醉倒沙場」，最後親自埋單的阿廉笑說：「唔擔心天明走數！（埋單幾錢？）接近五位數，長長久久，好意頭！」