薛凱琪（Fiona）上月才舉行完紅館演唱會，只放了三日假，又要投入新大碟《Tonight》的宣傳。新碟中的《Just you and me》由她親自作曲，她說：「我覺得冇嘢好得過送我心中嘅畫面同旋律畀Fans！呢首係浪漫嘅R&B歌，偏向型格，唔係流行主打歌，所以應該都唔會打歌喇！反而係送畀Fans嘅小禮物。」

Fiona親自作曲冧Fans，認真識做！

雖然工作排得密密麻麻，但恍如女鐵人的Fiona卻絕不抱怨：「唔係一定有公司肯Support開紅館四面台，唔一定會出實物嘅碟，依家我又開到演唱會又出碟，我又拍到電影，我覺得歌影視三棲可以並存，係天畀我嘅一份禮物，所以我唔會怨辛苦，而且工作狂得嚟會Make Sure做嘅嘢係最好。」