台灣名模許維恩早前「旋風式」襲港，趁空檔與好友「綠魔」Karl（許嘉浩）現身銅鑼灣血拼，毫無架子的她更當街篤魚蛋，又與Karl上樓掃平貨，滿載而歸。

許維恩（右）與「好姊妹」Karl當街當巷篤魚蛋，食得滋味。

許維恩與Karl齊齊試化妝品，試得不亦樂乎。

許維恩與Karl邊行街邊密斟，勁開心！

有「完美人妻」之稱的台灣名模來港完成一連串工作後，即相約好友「綠魔」Karl到銅鑼灣行街，想不到貴為名模的她居然毫無架子，掃平貨兼食街邊檔！

「好姊妹」雞啄唔斷

當日晚上8時許，身穿斜膊裝加熱褲的許維恩與Karl現身便利店，兩人邊睇雜誌中的美女邊密斟。在o靚模界撈到風生水起的Karl，對一班o靚模姊妹瞭如指掌，相信有無限心得分享，難怪全程雞啄唔斷。其後，Karl一盡地主之誼，帶許維恩周圍捐窿捐罅「尋寶」，Karl更帶她上舊樓睇「女人嘢」。

親密捉手挨膊頭

在化妝店內，許維恩幾乎將所有產品都搽上手，又聞又試，玩得不亦樂乎。而Karl，更Sales上身，為許維恩詳盡介紹。期間，許維恩在試泡泡面膜時突然High爆大笑，更捉實Karl的手兼挨向其膊頭，頓時令Karl不知所措。掃完平價化妝品後，許維恩又與Karl一嘗地道美食，毫無架子的許維恩無視途人，站在街邊篤魚蛋，又不顧儀態地大啖食，十分滋味。