反佔中王晶Unfriend秋生阿澤何詩
以敢言見稱的導演王晶，前日發表「反佔中」撐警言論遭網友圍插，百毒不侵的他輕易還擊後，昨日卻突然向「佔中福祿壽」黃秋生、杜汶澤及何韻詩下「Unfriend令」，怒刪三人電話號碼講明冇Friend做！
王晶與杜汶澤曾多次合作爆笑彈，如今可能成絕響！
秋生寸爆感謝王晶多年來關照，自言一早已沒有對方電話。
何韻詩（左二）曾為佔中站台，與晶哥的立場南轅北轍。
（設計對白）
著名導演王晶向來敢作敢為，以不平則鳴見稱，「有嗰句講嗰句」的他近日在微博發表對「佔中」的看法，想不到引發與網友的罵戰外，還令他在微博宣布與「佔中福祿壽」黃秋生、杜汶澤及何韻詩劃清界線，即使大家曾有愉快合作，但從今不再聯絡！
事緣前日下午，晶哥在微博留言支持警察的立場：「我依然撐警察！人家執行職務，你居然用尿潑人？打死都冇得怨！我覺得打得少！」隨即引起網友熱烈「關注」，並紛紛留言圍插他，正所謂「你有你講，我有我繼續」，對於網友的偏激留言，晶哥都一一應付下來，更不時留言還擊。
「祝佢性生活愉快」
當與網友的罵戰似乎告一段落之際，晶哥昨午再度留言，向對「佔中」事事關心兼插爆「反佔中」的「佔中福祿壽」黃秋生、杜汶澤及何韻詩宣布劃清界線，並刪除對方的聯絡方式，即使曾合作亦冇情講：「黃秋生先生，杜汶澤先生，何韻詩小姐，我們曾經有過很愉快的合作。我也尊重你們可以有個人的政治主張。但絕不認同。為免尷尬，你們的聯絡方式將會在我手機及電腦刪除。祝生活愉快！」博文一出，網友再次「關注」晶哥，除了發起罷睇其電影外，連他的亡父王天林亦被擺上枱，火藥味濃烈，他的微博更登上搜尋榜第一位！
對於「Unfriend」一事，杜汶澤寸爆晶哥，反祝福對方性生活愉快：「又唔見佢講周潤發？佢份人，我好明，是但啦！哈哈，祝佢性生活愉快！」而秋生昨日透過短訊坦言不相信：「你哋親口問過晶哥未呀？以我認識嘅晶哥唔似會咁講，冇必要，同埋就算係都會有發哥（周潤發）啦！仲有阿詩（何韻詩）好似冇乜同佢合作，我亦都冇佢電郵，疑點甚多。」當秋生得悉是王晶本人親口說出後只說：「每個人都有唔同決定，有自由。（以前都成日傾社會議題？）冇！傾拍戲同講笑話，交情OK。（搵番佢傾件事？）唔需要！正如唔同宗教之間唔使解釋。（遺憾？）覺得小朋友咗啲，作風同我認識嘅佢非常唔同！Delete咪Delete，話避免尷尬，講出嚟咪仲尷尬！」
事後，秋生在Facebook寸爆反擊：「多謝你咁多年咁關照我，估唔到你仲有我電話添，連我取消咗十年嘅電郵都有，我真係好感動，我咁多年都冇你電話，好慚愧……」何韻同樣在Facebook寸寸貢，指根本沒有對方電話：「我哋完全冇私交喎！點解會有我電話呢？一係就特登問人攞我電話入落電話度再刪走，一係佢就只不過係Unfriend咗我個經理人……估唔到大家咁重視我，多謝賞面……」
指有人言論太偏激
面對「佔中福祿壽」反擊，王晶昨日透過電話及短訊斷言不會與「佔中福祿壽」合作，並坦言預咗受攻擊：「杜汶澤講過反佔中唔係佢朋友，我好肯定係反佔中嘅。（阿澤祝你性生活愉快？）唔回應啦！我唔係針對某個人，只係講出我個人睇法。（點解淨係同佢哋絕交？因為言論偏激？）係！唔少藝人都話唔想學生受傷，我都唔想！但有啲人根本唔知發生緊咩事，有人成日唔喺香港，講嘅嘢有誤導成分。（秋生唔信你講話唔合作。）唔回應喇！」
