無綫花旦鍾嘉欣前晚高調現身緋聞男友伍允龍主演的電影首映禮，兩人大方「世紀合照」，又不時甜笑互望兼「蜜」斟，莫非想感情浮面？

鍾嘉欣大方上台與伍允龍合照，為公開戀情邁進了一大步！

伍允龍收下王晶（右）送上的符，即被取笑用來鎮住女友。

鍾嘉欣與武打影星伍允龍（Philip）發展地下情七年，前晚高調出席男友擔正電影《天師鬥殭屍》的首映禮，夠晒畀面！

大方合照冇尷尬

Philip及監製王晶等現身首映禮，男主角鄭中基因病缺席。期間鍾嘉欣突然殺到，並大方上台與Philip合照，兩人更毫不避忌地互望兼咬耳仔。當晶哥送上一道「哪吒動作必殺符」給Philip時，大會司儀即笑說：「鎮住鍾嘉欣嘅符？」晶哥即打趣地說：「鍾嘉欣梗係必殺啦！」令在旁的Philip只懂傻笑。

而嘉欣亦承認是Philip請她到場：「呢行好靠關係，不嬲都係你撐我、我撐你。（同台合照尷尬？）冇冇冇！」她坦言今次是六年來首次睇首映，問到是否將感情浮面，她說：「唔關事，今日得閒，有朋友請我睇戲咪嚟囉。（公開戀情？）睇戲啫！（驚時挨落Philip度？）我驚會縮埋一舊。（縮落佢度？）唔會，一陣應該同女性朋友坐。」她又指想扮演西式吸血殭屍，亦不排除與Philip合作：「要經公司，個角色啱我、有挑戰都會考慮。」

七年情風雨同路

而擔任動作指導的Philip則表示首次與偶像元彪合作有點緊張，提到演喜劇的搞笑功力，他笑言完全冇難度。

鍾嘉欣與伍允龍於2007年拍電影《十分愛》認識，有傳男方奪得芳心後，嘉欣引薦他做MV《二人世界》的男主角，雖然二人於2012年流出搭膊唱K照及伍允龍大讚嘉欣是101分女友，但仍不認戀情。去年有指伍允龍分手後另結新歡，嘉欣即公開指感情未變。而今年伍允龍37歲生日，嘉欣亦為男友慶生兼大方合照。其後二人被《好報》拍得與朋友到餐廳食飯，兩杯落肚的伍允龍想掃嘉欣玉背，嘉欣即以「河東獅睥」令男友縮手，明顯「食」住對方！