吳彥祖昨日為其蠟像揭幕，他透露女兒Raven出世後已將家庭和女兒放在第一位，現階段想盡快生多個，還笑言畢竟年紀不小，再大一點追就困難了！

吳彥祖（右）甫見到他的蠟像，即興奮地舉起手機合照。

一向愛錫太太及女兒的吳彥祖，希望帶她們參觀其蠟像。

吳彥祖昨日到杜莎夫人蠟像館為個人蠟像揭幕，蠟像根據他早前在柏林國際電影節行紅地氈時的造型製成，他說：「之前大家都開過會討論係咪用電影角色造型，原本想用《竊聽風雲3》個造型，但搵唔番啲戲服，之後要做嘢唔可以變番個髮型。」問到會否偕太太Lisa S.及女兒Raven一同參觀這個蠟像，他笑說：「有機會都想，但擔心個女會攪亂，唔知邊個係佢爸爸。」

香港教育欠自由

問到會否讓女兒在美國讀書，吳彥祖說：「都係，因為好唔鍾意香港啲私人學校嘅形式，一個細路仔唔應該咁細過要經歷呢啲競爭，好唔健康，加上我哋身份問題，個女好似住喺個氣球入面，會好唔舒服，希望佢可以好自由咁返學，但喺香港做唔到。」問到會否再追多個小朋友，他說：「想o架！希望盡快啦！大家都年紀大喇！再大啲就唔得喇！我阿爸四十五歲生我，細個時好多運動爸爸都陪唔到我。」

工作一浪接一浪

吳彥祖又指早幾日才回港，早前太太外出工作，他則負責照顧女兒，問到是否已全面復工，他說：「我下星期去美國拍戲，三月返香港拍戲，四月同馮德倫監製一部美國電視劇。」

此外，他又透露開設的香港經理人公司已解散，但仍保留了一間製作公司運作：「因為想多啲時間放喺個女同家庭度，做經理人真係需要好多時間。」