藝人謝婷婷昨日為《i.t 2014秋冬時裝騷及鞋履展》行騷，同場嘉賓有陳慧琳、關楚耀、洪卓立、Super Girls及傅嘉莉等。提到哥哥謝霆鋒跟王菲世紀復合一事，婷婷說：「之前喺意大利做嘢時助手有講我知。（恭喜咗哥哥未？）我淨係問佢喺邊，尋日問咗，佢話喺北京，佢每次有拖拍我都唔會即刻恭喜佢，我哋兩個都扮Cool。（佢請假一個月陪王菲？）唔知。（你冇問？）問謝霆鋒分享佢嘅感情事？好奇怪囉！」

婷婷對於哥哥霆鋒翻撻王菲大表支持。

靚媽陳慧琳悉心打扮，明艷照人！

吸金多瓣數的傅嘉莉落力行騷。

婷婷又對霆鋒可以愛人及被愛大感高興：「人生係為愛而生存，佢離婚後已經有段時間冇拍拖，哥哥開心就得，無論係同邊個都好。（想唔想哥哥約王菲出嚟同你見吓？）我真係冇見過佢哋一齊，佢哋之前拍拖係我同哥哥最疏離嘅時候，我仲讀緊書。見過阿菲一次，嗰時佢同哥哥拍緊拖，我入升降機佢出升降機，佢好溫柔咁同我Say咗個Hi。」