享樂團首度出碟搞簽唱會，吸引近百粉絲撐場勁墟冚。
樂隊享樂團近日雙喜臨門，首次出碟兼舉行簽唱會！Fans精心營造的星海下，唱足45分鐘的他們恍如開迷你騷，但急於為Fans簽名的主音阿Don竟忘記買新鮮出爐的處男作，錯失第一次！
阿Don與隊友手起筆落係咁簽，簽到唔記得買番隻「親生仔」！
近日推出首張專輯《靜香》的樂隊享樂團，日前到商場舉行首個新碟簽唱會，吸引近百名粉絲撐場，並於短短45分鐘內唱出《年輕的心跳》、《靜香》與《流星》等成名作，又翻唱了偶像五月天、陳奕迅及陶喆等歌曲。
主音之一的旨呈表示最感動的是見到很多久違了的面孔：「我哋之前玩地下Band玩咗一段時間，有好多好耐冇見嘅朋友、或者可能一啲大型音樂會先嚟嘅朋友，一次過出晒嚟，幾Surprise！」他又感謝粉絲的回禮：「我收到一個Fans特登喺日本買嘅靜香百力滋，我哋又有一人一幅自畫像，好有心思。唱《靜香》嗰時大家開晒電話燈，成百幾個人，感覺好好Feel！」
掃10隻派街坊
另一主音阿Don則透露見到屬於自己的唱碟面世，非常感動：「其實之前已經見到完成品，但嗰日先係第一次見到隻碟上架，但好遺憾嗰日影完相就去咗簽名，冇即刻買一隻！我喺公司買咗10隻諗住派畀人，有送一隻畀許廷鏗，可能唔係好多人記得，其實我都玩過《超級巨聲》！」問到七位成員裏誰最受歡迎？他笑說：「最多嘅咪阿Paul、旨呈同我，可能兩個主音着數啲，咁阿Paul咁靚仔又大隻，網上又多Fans，梗係受歡迎！」
音樂組
