王浩信於新劇中飾演爛撻撻兼口賤的懲教官，今次角色相信可真正為他「轉型」，拍此劇前更急不及待狂操Fit身形，不諱言劇中有一場要一個打十個！

做厭有錢仔的王浩信改演賤精，挑戰戲路大突破。

王浩信密密操Fit，等睇佢點一打十！

王浩信夥拍吳啟華等鬥「戲」，隨時有力爭男配角獎。

新劇《再戰明天》中，王浩信飾演爛撻撻兼口賤的懲教官，與官仔骨骨的他反差甚大！他直言近期有不少發揮機會包括《貓屎媽媽》與《愛我請留言》等，故曾跟公司商量希望可做多些其他類型的角色「轉型」：「入行第一套劇就做有錢仔，之後成日做呢類角色，希望有啲改變！今次喺《再戰明天》中飾演平時口賤賤、爛撻撻但又收得好埋嘅懲教署官員，有啲似《秋天的童話》周潤發飾演嘅船頭尺，自己都有睇番發哥嘅演繹，再加番自己嘢落去演。」為了飾演懲教官，浩信即勤加操練，而監製林志華見他苦操多時，特別加入一場冇衫着的戲份，他笑說：「就係因為呢場戲，搞到兩、三個月冇啖好食！劇中有場一個打十個嘅場口，為咗更有說服力，真係要好Fit先得。」

男配有提名當攞獎

提到去年台慶奪得「飛躍進步男藝員」獎項，問到得獎後有甚麼實際得着？浩信坦言反而是個警惕：「令我經常提醒自己要做得更好！角色方面亦多咗好多嘗試。」如拍攝中的《樓奴》便是浩信首次擔正男主角，劇情提及巿民買樓心聲，現實中的他亦經常表示要努力賺錢買樓：「基本上依家都上唔到車，直至依家都係租樓住，仲要愈嚟愈大壓力！（有冇影響再生小朋友決定？）生個女嗰陣都冇諗過可以負擔到咁多，香港人承受壓力能力好高，嚟到我就OK。」

問到會否對今年台慶「男配角」一獎虎視眈眈時，浩信說：「今年有提名已經當攞咗，有任何獎項都係Bonus，依家好期待《再戰明天》播出。」